ކްރިމިނަލް ކޯޓުގެ ފަނޑިޔާރު، ހުސެއިން ފާއިޒް މަގާމުން ވަކިކުރުމަށް ރައްޔިތުންގެ މަޖިލީހުން ތާއީދުކޮށްފި އެވެ.
ޖުޑިޝަލް ސާވިސް ކޮމިޝަން (ޖޭއެސްސީ)އިން ފާއިޒުގެ މައްސަލަތަކެއް ބެލުމަށް ފަހު، އޭނާ މަގާމުން ވަކިކުރުމަށް މަޖިލީހަށް ފޮނުވީ މިދިޔަ މަހުގެ ތެރޭގަ އެވެ. އެ މައްސަލަ ދިރާސާކުރުމަށްފަހު މަޖިލީހުގެ ޖުޑީޝަރީ ކޮމިޓީން ނިންމީ ފާއިޒް ފަނޑިޔާރުކަމުން ވަކިކުރަން ޖޭއެސްސީން ނިންމީ ރަނގަޅަށް ކަމަށެވެ.
އެ ކޮމިޓީން އެކުލަވާލި ރިޕޯޓު ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްވީ 56 މެމްބަރުންގެ ވޯޓާ އެކު އެވެ. ދެކޮޅަށް އެމްޑީޕީގެ 8 މެމްބަރަކު ވޯޓު ދެއްވި އެވެ.
ފާއިޒު ފަނޑިޔާރުކަމުން ވަކިކުރުމަށް ޖޭއެސްސީން ނިންމީ މަސްތުވާތަކެތީގެ މައްސަލައެއްގައި ފުލުހުންގެ ބެލުމުގެ ދަށަށް ގެނެސްފައި ހުރި މީހެއްގައި ބަންދާ މެދު ގޮތް ކަނޑައެޅުމުގައި ގާނޫނުއަސާސީއާ ގާނޫނުތަކާ ހިލާފަށް އަމަލު ކުރިކަމަށް ބުނާ މައްސަލައިގަ އެވެ. އަދި، އައިޖީއެމްއެޗުގައި މަސައްކަތް ކުރި ފިލިޕީންސް ނަރުހެއް ކަމަށްވާ މޭރީ ގްރޭސް މަރައިލި މައްސަލައިގައި ހައްޔަރުކޮށްފައިވާ ހަލީމަތު ލަމްހާ އަބްދުއްރަހީމް އެކި ފަހަރު މަތިން ބަންދުން ދޫކޮށްލި މައްސަލަ ވެސް ހިމެނެއެވެ.
