ފުވައްމުލައް ސިޓީގެ ފެނުގެ ނިޒާމަށް ދިމާވި މައްސަލައާ ގުޅިގެން މިދިޔަ މަހު އެ ސިޓީގެ ފެނަށް ބިލު ނުކުރުމަށް ފެނަކައިން ނިންމައިފި އެވެ.
ރަށުން ފެނުގެ ނިޒާމު ތަޣައްޔަރުވެ، އެ ހިދުމަތް މިދިޔަ މަހު މެދުކެނޑުނެވެ. އެ މައްސަލައާ ގުޅިގެން ފުވައްމުލަކު ފެނަކަ ބްރާންޗުން މިއަދު ނެރުނު ބަޔާނެއްގައި ބުނެފައިވަނީ ފެނުގެ މައްސަލަ ހައްލުކޮށް ރަނގަޅު ފެންވަރެއްގައި، އެ ހިދުމަތް އަލުން ދިނުމަށްޓަކައި ކުރަންޖެހޭ ކަންކަން ހުއްޓުމެއްނެތި ކުރަމުންދާ ކަމަށެވެ.
ވޭތުވެދިޔަ، ދުވަސްތަކުގައި ފުވައްމުލައް ސިޓީގެ ފެނުގެ ނެޓްވޯކްގެ މަސައްކަތްތަކެއް ކުރަމުންދިޔައިރު، އެކި ވަގުތުތަކުގައި ފެން ކެނޑުމާއި ފެނުގެ، ޕްރެޝަރު ދަށްވުންފަދަ މައްސަލަތައް ހައްލުކުރުމަށްޓަކައި މިހާރު އެ ސިޓީގެ ފެނުގެ، ނިޒާމު އަޕްގްރޭޑުކުރުމުގެ މަސައްކަތް ކުރަމުންދާ ކަމަށް ފެނަކަ އިން ވަނީ ބުނެފަ އެވެ.
އެހެންވެ، ރައްޔިތުންނަށް ލުޔެއް ދިނުމަށްޓަކައި މިދިޔަ ނޮވެންބަރު މަހު އެ ސިޓީގެ ފެނަށް ބިލުނުކުރާގޮތަށް ނިންމާފައިވާ ކަމަށް އެ ކުންފުނިން ވަނީ ބުނެފަ އެވެ.
އެ ސިޓގައި ފެނުގެ މައްސަލަ ފެންމަތިވުމާއެކު ސަރުކާރުން ސިފައިން މެދުވެރިކޮށް، ކަނޑާއި ވައިގެ މަގުން ފުވައްމުލަކަށް ބޯފެން ފޯރުކޮށްދިނުމާއި އަދި ބޭނުންވާ އެހެނިހެން އެހީތެރިކަން ފޯރުކޮށްދީފަ އެވެ.
