ޖިންސީ ގޯނާގެ ތުހުމަތު ކުރެވިފައިވާ ޑރ. ހުސައިން ސަނީ އުމަރު، ފިލައިގެން ދާން އެއާޕޯޓުގައި ހުއްޓައި ހައްޔަރުކޮށްފި އެވެ.
އޭނާ ފުލުހުންގެ އިދާރާއަށް ހާޒިރުކޮށް ސުވާލުކުރި ފަހުން، ރާއްޖެއިން ފުރަން އުޅެނިކޮށް އެއާޕޯޓުން ހައްޔަރުކުރީ ކަމަށް ފުލުހުން ބުނެ އެވެ. ނަމަވެސް އޭނާ ފުރަން އުޅުނު މަންޒިލެއް ސާފެއް ނުވެ އެވެ.
ޓްރެވެލް އެޖެންސީއަކާއި ޓްރެވެލް ދާއިރާގެ މީޑިއާއެއް ހިންގާ ޕީއާރު ފާމެއްގައި ވެސް އިސްކޮށް ހަރަކާތްތެރިވާ ސަނީއަށް ކުރާ ޖިންސީ ގޯނާގެ ތުހުމަތު ފުލުހުންނަށް ހުށަހެޅީ އެ ކުދިންގެ އާއިލާގެ ފަރާތުން ކަމަށް ފުލުހުން ކުރިން ވަނީ ހާމަކޮށްފަ އެވެ.
ސަނީ އުމަރު ރާއްޖެ އައުމާއެކު، އޭނާގެ މައްޗަށް ކުރެވޭ ޖިންސީ ގޯނާގެ ތުހުމަތުތަކާ ގުޅޭގޮތުން ސުވާލުކުރުމަށް ފުލުހުންގެ, ފެމެލީ އެންޑް ޗައިލްޑް ޕްރޮޓެކްޝަން (އެފްސީޕީ) ޔުނިޓަށް ހާޒިރުކުރި އެވެ.
އެ ތުހުމަތުތަކާ ގުޅިގެން "ދަ ޓްރެވެލް ގައިސް" އިން ނެރުނު ނޫސްބަޔާނެއްގައި ބުނެފައިވަނީ، ސަނީ އުމަރުގެ ހިއްސާ އެ ކުންފުނީގެ ބޯޑުން އަތުލަން ނިންމާފައިވާ ކަމަށާއި، މިހާތަނަށް އެ ހިއްސާ އެހެން ފަރާތަކަށް ވިއްކާލާފައިނުވާނެ ކަމަށެވެ.
