ތޫފާން ދީތުވާގެ ސަބަބުން ބޮޑެތި ގެއްލުންތަކާ ކުރިމަތިވެފައިވާ ސްރީ ލަންކާއަށް އެހީވުމަށް ބޭއްވި "ސިލޯނާއެކު ދިވެހީން" ޓެލެތޯންގައި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން 250,000 ރުފިޔާ ހަދިޔާކޮށްފި އެވެ.
އެމްއޭސީއެލް އިން ބުނިގޮތުގައި، ކޯޕަރޭޓް ސޯޝަލް ރެސްޕޮންސިބިލިޓީ (ސީ.އެސް.އާރު) ގެ ދަށުން، އެމް.އޭ.ސީ.އެލްގެ މެނޭޖްމަންޓާއި މުވައްޒަފުން ގުޅިގެން 250,000 ރުފިޔާ ވަނީ ހަދިޔާކޮށްފަ އެވެ.އަދި އެމްއޭސީއެލް އިން ވަނީ މި ހާދިސާގައި ހާލުގައި ޖެހުނު ހުރިހާ ފަރާތްތަކަށް ހަމްދަރުދީ ވެސް ފޮނުވާފަ އެވެ.
ތޫފާން ދީތުވާގެ ސަބަބުން ސްރީ ލަންކާއަށް ވަނީ މީގެ ކުރިން ނުދެކޭފަދަ ބޮޑެތި ގެއްލުންތަކެއް ލިބިފަ އެވެ. ގިނަ ބަޔަކު ވަޒަންވެރިވެފައިވާ ތަންތަން ގެއްލި، ބިންގަނޑު ކަނޑައިގެން ދިއުމާއި، ވަރަށް ގިނަ އުމްރާނީ ތަރައްގީގެ މަސައްކަތްތަކަށް ގެއްލުން ލިބިފަވެ އެވެ.
