މާލޭގައި އާކޭޑް ގޭމްސް އަދި އީ- ސްޕޯޓްސް ކުޅޭވޭނެ މަރުކަޒެއް ހެދުމަށް ނިންމާފައިވާ ކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފި އެވެ.
ރައީސް އެކަން ހާމަކުރެއްވީ ރޭ މައްޗަންގޯޅީގެ ރައްޔިތުންނާއި ބައްދަލުކުރައްވައި ވާހަކަފުޅުދައްކަވަމުންނެވެ.
ރައީސް ވިދާޅުވީ ކުރީގެ އެމްއޭސީއެލް ފްލެޓްތަކާއި ބުރުޒު މަގުގައި ގިނަ ދުވަސްވެފައިވާ ގޯތިތަކެއް ހުންނާނެ ކަމަށެވެ. އަދި އެތަންތަން ތަޅައި އެއްކޮށް ސާފުކުރުމުގެ މަސައްކަތް މިހާރު ކުރަމުންދާ ކަމަށް ވިދާޅުވި އެވެ. އަދި އެތަނުން އެއްް ގޯތީގައި އާކޭޑް ގޭމްސް ކުޅެވޭ ކަހަލަ މަރުކަޒެއް ހެދުމަށް ނިންމާފައިވާ ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ ޒުވާނުންގެ ތެރޭގައި އެކިކަހަލަ ކުޅިވަރުކުޅޭ ފަރާތްތަކަށް ބޭނުންވާނެ ފުރުސަތުތައް ހޯދައިދެއްވުމަށް ބޭނުންފުޅުވާ ކަމަށެވެ. އަދި މާލެ ތެރޭގައި ކުދިން ނިކުންނާނެ ތަނެއް ނެތް ކަން ފާހަގަކުރައްވަމުން ރައީސް ވަނީ ސަރުކާރުން ބޭނުންވަނީ އެކަހަލަ ތަންތަން ހެދުމަށް ކަން ތަކުރާރުކުރައްވާފަ އެވެ. އަދި ސަރުކާރުގެ ޕްލޭނަކީ އެކަހަލަ ބައެއް ކުޅިވަރު ކުޅެވޭ ތަންތަން ހަދައިދިނުން ކަމަށް ރައީސް ވިދާޅުވި އެވެ. އެގޮތުން، ފުޓްސެލް ކުޅޭނެ ދަނޑުތަކާއި، ނެޓް ބޯޅަ ފަދަ ކޯޓުތައް އަޅުއްވައިދެއްވާނެ ކަމަށްވެސް ވިދާޅުވި އެވެ.