އަންނަ އަހަރަށް ލަފާކޮށް ސަރުކާރުން ހުށަހެޅި 64.2 ބިލިއަން ރުފިޔާގެ ބަޖެޓަށް ބަދަލެއް ނުގެނެސް ،ރައްޔިތުންގެ މަޖިލީހުން މިއަދު އެ ބަޖެޓު ފާސްކޮށްފި އެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި، ސަރުކާރުން ހުށަހެޅި ގޮތަށް އެ ބަޖެޓު ފާސްކުރަން މިއަދު ނެގި ވޯޓުގައި ބަޖެޓް ފާސްކުރީ 74 މެމްބަރުންގެ ތާއިދާއެކު އެވެ. ބަޖެޓް ފާސްކުރަން ނުފެންނަކަމަށް ވޯޓް ދެއްވީ މަޖލީހުގައި ހިމެނޭ އިދިކޮޅު އެމްޑީޕީއަށް ނިސްބަތްވާ 12 މެމްބަރުންނެވެ.

ބަޖެޓް މަޖިލިހަށް ހުށައަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވެފައިވަނީ މި ބަޖުޓު ފަރުމާ ކޮށްފައިވާނީ މާލީ ހަރުދަނާކަން އިތުރުކޮށް ދިވެހިންނައް ހަގީގީ މާނައިގައި ތަރައްގީ ގެނެވޭނެ ގޮތަކަށް ވިސްނައިގެން ކަމަށެވެ.

އަންނަ އަހަރުގެ ތެރޭގައި ސަރުކާރުން ދައްކަން ޖެހޭ 500 މިލިއަން ރުފިޔާގެ ސުކޫކާއި 100 މިލިއަން ޑޮލަރުގެ ބޮންޑު އަނބުރާ ދެއްކުމުގެ ހަރަދު ނުލައި އަންނަ އަހަރުގެ ބަޖެޓަކީ 54.9 ބިލިއަން ރުފިޔާ އެވެ. މިއީ މިދިޔަ އަހަރު ފާސްކުރި ބަޖެޓަށް ވުރެ ކުޑަ އަދަދެކެވެ.

ޖުމްލަ ހަރަދުގެ ގޮތުގައި 49.2 ބިލިއަން ހޭދަވާނެ ކަމަށް ލަފާކުރާއިރު ދަރަނި ދައްކަން 12.9 ބިލިއަން ރުފިޔާ ހޭދަވާނެ ކަމަށް ބަޖެޓުގައި ކަނޑައަޅާފައިވެ އެވެ. އަންނަ އަހަރަށް ލަފާކޮށް ހުށަހެޅި ބަޖެޓުގައި އާމްދަނީއާއި ހިލޭ އެހީގެ ގޮތުގައި 40.4 ބިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ. އެއީ މި އަހަރާ އަޅާބަލާއިރު 6.6 %ގެ ކުރިއެރުމެކެވެ. އޭގެ ތެރޭގައި ޓެކްސް ނޫން އާމްދަނީގެ ގޮތުގައި 8.7 ބިލިއަން ރުފިޔާ އާއި ހިލޭ އެހީގެ ގޮތުގައި 373.6 މިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ.