މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަންގެ މަގާމުގައި ހުންނެވި ފައްޔާޒު އިސްމާއިލް އިސްތިއުފާ ދެއްވައިފި އެވެ.
ކުރީ ސަރުކާރުގައި އިކޮނޮމިކް މިނިސްޓަރުކަން ކުރެއްވި ފައްޔާޒު، އިދިކޮޅު ޕާޓީގެ ޗެއާޕާސަންގެ މަގާމުން އިސްތިއުފާ ދެއްވިކަން އިއުލާން ކުރެއްވީ އާދީއްތަ ދުވަހުގެ ރޭ ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުން ނިންމަވާލައްވަމުން ނެވެ.
ފައްޔާޒް ވިދާޅުވީ، އެ ޕާޓީ ހިންގެވުމަށް އެބޭފުޅާއަކީ ހުރަހަކަށް ވާން ބޭނުންނުވާ ކަމަށެވެ. އަދި، މިވަގުތު ހާލަތަށް ބަލައި ޗެއާޕާސަން ކަމުގެ މަގާމުގައި ހުރުން މަސްލަހަތު ރަނގަޅު ނޫންކަމަށް ފައްޔާޒް ވިދާޅުވެފައިވެ އެވެ.
އޭނާ އިތުރަށް ވިދާޅުވީ، އަސާސީ ހައްގުތަކާއި ރައްޔިތުންގެ ބާރުވެރިކަން ހޯދައިދިން ޕާޓީގެ މެންބަރުންނާއެކު ގާތުން މަސައްކަތް ކުރެވުމަކީ އޭނާގެ ހަޔާތުގައި ލިބުނު އެންމެ ބޮޑު އެއް ޝަރަފު ކަމަށެވެ. އަދި ކުރިއަށް އޮތް ދުވަސްތަކުގައި ވެސް އެ ޕާޓީގެ ގައުމީ މަޖިލީހާއި އާންމު މެންބަރެއްގެ ގޮތުގައި އިސްލާހީ މަސައްކަތުގައި ދެމިހުންނާނެ ކަމުގެ ޔަގީންކަން ފައްޔާޒް ވަނީ ދީފަ އެވެ.
ފައްޔާޒް އެމްޑީޕީގެ ޗެއާޕާސަންގެ މަގާމަށް އިންތިހާބުވީ މީގެ ތިން އަހަރު ކުރިން، 2022 ވަނަ އަހަރުގެ މެއި މަހުގެ 23 ވަނަ ދުވަހު ބޭއްވި އެތެރޭގެ އިންތިހާބުގަ އެވެ.
