އަންނަ އަހަރު ރާއްޖޭގެ އިގްތިސާދު 5.3 އިންސައްތަ ކުރިއަރާނެ ކަމަށް ލަފާކޮށްފި އެވެ.
އަންނަ އަހަރަށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައިވާގޮތުން 2026 ވަނަ އަހަރާއި 2028 ވަނަ އަހަރާދެމެދު ރާއްޖޭގެ އިގުތިސާދީ ކުރިއެރުން އެވަރެޖްކޮށް ހުންނާނެކަމަށް އަންދާޒާކުރެވެނީ 4.9%ގަ އެވެ.
މިފަދަ ބޮޑު އިގްތިސާދީ ކުރިއެރުމެއް ލިބުމުގެ މައިގަނޑު ސަބަބެއްގެ ގޮތުގައި ހިމަނާފައިވަނީ ފަތުރުވެރިކަމުގެ ދާއިރާއިން ލިބޭ ކުރިއެރުމެވެ. އެގޮތުން ވެލާނާ އިންޓާނޭޝަނަލް އެއާޕޯޓުގެ އައު ޕެސެންޖަރު ޓާމިނަލް ބޭނުން ކުރަން ފެށުމުން، 2026 ވަނަ އަހަރުގައާއި ދިވެހިރާއްޖެއަށް ދަތުރުކުރާ ފަތުރުވެރިންގެ އަދަދު އިތުރުވާނެ ކަމަށް ލަފާކޮށްފައިވެ އެވެ.
މިއާއި އެކު ފަތުރުވެރިކަމާ ގުޅުންހުރި އެހެން ސިނާއަތްތައް ވެސް ކުރިއަރާނެ ކަމަށް ލަފާކޮށްފައިވާއިރު، ޕީއެސްއައިޕީއަށް ކުރާނެ ހަރަދަށް ރިއާޔަތްކޮށް، ކޮންސްޓްރަކްޝަން އަދި ރިއަލް އެސްޓޭޓު ދާއިރާ އެވްރެޖުކޮށް %3.1 ކުރިއަރާނެ ކަމަށް ވެސް ބަޖެޓުގައި ވަނީ ލަފާކޮށްފައިވެ އެވެ.
ރާއްޖޭގެ ރަސްމީ ރިޒާވް 2024 ވަނަ އަހަރު ނިމުނުއިރު 673.9 މިލިއަން އެމެރިކާ ޑޮލަރުގައި ހުރެ، ބޭރު ފައިސާގެ ގާނޫނާއި ގަވާއިދަށް ގެނެވިފައިވާ ބަދަލުތަކާއި އިގުތިސާދީ ކުރިއެރުމާއެކު 2025 ވަނަ އަހަރު ރަސްމީ ރިޒާވް 848.6 މިލިއަން އެމެރިކާ ޑޮލަރަށް އިތުރުވާނެކަމަށް ބަޖެޓުގައި ވަނީ ލަފާކޮށްފަ އެވެ. އަދި 2026 ވަނަ އަހަރު ރަސްމީ ރިޒާވް 903.7 މިލިއަން އެމެރިކާ ޑޮލަރަށް އިތުރުވާނެކަމަށް ލަފާކޮށްފައިވެ އެވެ.
