ސަރުކާރުގެ ފަރާތުން އަންނަ އަހަރަށް ލަފާކޮށް .54.9 ބިލިއަން ރުފިޔާގެ ރެކޯޑު ބަޖެޓެއް މިއަދު ރައްޔިތުންގެ މަޖިލީހަށް ހުށަހަޅައިފި އެވެ.

އަންނަ އަހަރަށް ލަފާ ކުރާ ދައުލަތުގެ ބަޖެޓު ހުށަހެޅުމަށްޓަކައި މިއަދު ބޭއްވި ޖަލްސާގައި ފިނޭންސް މިނިސްޓަރު މޫސާ ޒަމީރު ވަނީ މުޅި ޖުމްލަ 64،202،565،720ރ. (ފަސް ދޮޅަސްް ހަތަރު ބިލިއަން ދުއި ސައްތަ ދެ މިލިއަން ފަސް ލައްކަ ފަސްދޮޅަސް ފަސް ހާސް ހަތް ސަތޭކަ ވިހި ރުފިޔާ )ގެ ބަޖެޓެއް ހުށަހަޅާފަ އެވެ.

އަންނަ އަހަރުގެ ތެރޭގައި ސަރުކާރުން ދައްކަން ޖެހޭ 500 މިލިއަން ރުފިޔާގެ ސުކޫކާއި 100 މިލިއަން ޑޮލަރުގެ ބޮންޑު އަނބުރާ ދެއްކުމުގެ ހަރަދު ނުލައި އަންނަ އަހަރުގެ ބަޖެޓަކީ 54.9 ބިލިއަން ރުފިޔާ އެވެ. މިއީ މިދިޔަ އަހަރު ފާސްކުރި ބަޖެޓަށް ވުރެ ކުޑަ އަދަދެއްކަން މިނިސްޓަރު ފާހަގަކުރެއްވި އެވެ.

ޖުމްލަ ހަރަދުގެ ގޮތުގައި 49.2 ބިލިއަން ހޭދަވާނެ ކަމަށް ލަފާކުރާއިރު ދަރަނި ދައްކަން 12.9 ބިލިއަން ރުފިޔާ ހޭދަވާނެ ކަމަށް ބަޖެޓުގައި ކަނޑައަޅާފައިވެ އެވެ. އަންނަ އަހަރަށް ލަފާކޮށް ހުށަހެޅި ބަޖެޓުގައި އާމްދަނީއާއި ހިލޭ އެހީގެ ގޮތުގައި 40.4 ބިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ. އެއީ މި އަހަރާ އަޅާބަލާއިރު 6.6 %ގެ ކުރިއެރުމެއް ކަމަށް ފިނޭންސް މިނިސްޓަރު ވިދާޅުވި އެވެ. އޭގެ ތެރޭގައި ޓެކްސް ނޫން އާމްދަނީގެ ގޮތުގައި 8.7 ބިލިއަން ރުފިޔާ އާއި ހިލޭ އެހީގެ ގޮތުގައި 373.6 މިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ.

ޕީއެސްއައިޕީ މަޝްރޫއުތަކަށް ވެސް 8.3 ބިލިއަން ރުފިޔާ ކަނޑައަޅާފައިވާއިރު އެންމެ ބޮޑު އިސްކަމެއް ދީފައިވަނީ ދަތުރުފަތުރާއި ތައުލީމާއި، ބޯހިޔާވަހިކަމާއި ސިއްހަތުގެ އިތުރުން ތިމާވެށީގެ ދާއިރާއަށެވެ.

2026 ގެ ބަޖެޓު ކުރުކޮށް

· ޖުމްލަ ހަރަދު – 49.2 ބިލިއަން ރުފިޔާ

· ރިކަރަންޓު ހަރަދު- 39.9 ބިލިއަން ރުފިޔާ

· ޖުމްލަ ހިލޭ އެހީ އާއި އާމްދަނީ – 40.2 ބިލިއަން ރުފިޔާ

· ބަޖެޓް ޑެފިސިޓް – 8.8 ބިލިއަން ރުފިޔާ

· ދަރަނި އަދާކުރުމަށް- 12.9 ބިލިއަން ރުފިޔާ