ބިންވެރިޔާ ސްކީމުގެ ދަށުން ގުޅިފަޅުން ގޯތި ލިބުނު މީހުންގެ ރެޖިސްޓްރީއާއި އެއްބަސްވުމުގައި ސޮއިކުރުމުގެ ފަހު ފުރުސަތު ހައުސިން މިނިސްޓްރީން ހުޅުވާލައިފި އެވެ.
ކުރީގެ ރަޖިސްޓްރީތައް ބާތިލުކޮށް، ގޯތި ލިބޭ ސަރަހައްދުތައް އަލުން ކަނޑައަޅައި ސަރުކާރުން ދަނީ މިހާރުއެ ފަރާތްތަކާއެކު އަލުން އެއްބަސްވުންތައް އެކުލަވާލަމުން ނެވެ. ބައެއް މީހުން އެ އެއްބަސްވުމުގައި ސޮއިކުރަން ދެކޮޅު ހަދަމުންދާއިރު، ސަބަބެއް ކަމަށް އެ މީހުން ބުނަނީ އަލަށް ހަދާ އެއްބަސްވުމާއި ގޯތި ދިނުމުގެ އުސޫލާ ފުށުއަރާ ކަމަށެވެ. އެކަމަކު ސަރުކާރުން މިކަން ދޮގުކުރެ އެވެ.
މިނިސްޓްރީން މިއަދު ކޮށްފައިވާ އިއުލާނުގައިވާ ގޮތުން، ގޯތި ލިބިފައިވާ މީހުން އާ ރަޖިސްޓަރީ އާއި އެގްރީމަންޓުގައި ސޮއިކުރުމަށް ދީފައިވާ މުއްދަތު ވަނީ 06 ނޮވެންބަރާ ހަމަޔަށް ދަންމާލާފަ އެވެ. އަދި މިއީ ގުޅިފަޅު އެއްބަސްވުން އަދި ރަޖިސްޓަރީއާ ހަވާލުވުމަށް ދޭނެ އެންމެ ފަހު ފުރުސަތު ކަމާއި، މި މުއްދަތުގެ ތެރޭގައި އެޕޮއިންޓްމަންޓަށް އެދިފައިނުވާ ފަރާތްތަކަށް އެއްބަސްވުމުގައި ސޮއިކުރުމުގެ ފުރުސަތު ދެނެއް ނުދެވޭނެ ކަމަށް މިނިސްޓްރީން ވަނީ ބުނެފަ އެވެ.
މީގެއިތުރުން މިނިސްޓްރީން ވަނީ އެޕޮއިންޓްމަންޓަށް އެދޭއިރު ހުށަހަޅަންޖެހޭ ލިޔެކިޔުންތައް ފުރިހަމަނުކޮށް ހާޒިރުވާ ފަރާތްތަކަށް ދޭ އެޕޮއިންޓްމަންޓް ކެންސަލްކުރެވޭނެ ކަމަށްވެސް ބުނެފަ އެވެ.
