ރައްޔިތުންގެ މަޖިލީހުގެ އިދާރާގެ ޑިރެކްޓަރ އޮފް ކޮމިއުނިކޭޝަންސްގެ މަގާމުގައި ހުންނެވި ހަސަން ޒިޔާއު މަގާމުން ވަކިކޮށްފި އެވެ.
އެކަން ހާމަކޮށް ޒިޔާއު ވަނީ މަޖިލިސް މީޑިއާ ގްރޫގައި މީޑިއާތަކަށް މެސެޖެއް ހިއްސާކޮށްފަ އެވެ.
ޒިޔާއު ތުހުމަތުކޮށްފައިވާގޮތުން އޭނާ މަގާމުން ވަކިކޮށްފައިވަނީ ޒާތީ ހަސަދައެއް ފިލުވާލުމުގެ މަގްސަދުގަ އެވެ. ޑިރެކްޓަރ ކޮމިއުނިކޭޝަންގެ މަޤާމަކީ ސިޔާސީ މަޤާމަކަށް ނުވާއިރު އަޅުގަނޑު ވަކިކޮށްފައިވަނީ ޕާލަމެންޓަރީ ސަރވިސްގެ ޤާވާއިދާ ޚިލާފަށް ކަމަށް ޒިޔާއު ވިދާޅުވި އެވެ.
އެގޮތުން އޭނާ ވަޒީފާއިން ވަކިކުރީ އެ ޤާވާއިދުގައި ބަޔާންކުރާ އިޖުރާޢަތްތަކާ ދެކޮޅަށް, ނޯޓިސް ދިނުމަކާ ނުލާ އަވަސް އަރުވާލައިގެން ކަމަށް އޭނާ ވިދާޅުވި އެވެ. އަދި ވަކިކުރީ ޕާލަމެންޓަރީ ސަރވިސް ގަވާއިދުގެ ކޯޑު އޮފް ކޮންޑަކްޓާ ޚީލާފުވިކަމަށް ބުނެ ކަމަށް ވާއިރު، އެކަން ކުރީ ޒާތީ ހަސަދަވެރިކަމާ ހެދި ކަމަށް އޭނާ ވިދާޅުވި އެވެ.
ޕާލަމެންޓަރީ ސަރވިސް ގަވާއިދުގެ ކޯޑު އޮފް ކޮންޑަކްޓާ ޚީލާފުވިކަމަށް ބުނެ ވަކިކޮށްފައި ވަނީ ރައްޔިތުންގެ މަޖިލީހުގެ އިދާރާގެ އިސްވެރިން, ޚާއްސަކޮށް މަޖިލީހުގެ ޢަމީން އާންމު ފާތިމަތު ނިޔުޝާއާއި ޑެޕިއުޓީ ސެކްރެޓަރީ ޖެނެރަލް މުޙައްމަދު ރަޝީދު އާއި ހެޑް އޮފް އެޑްމިނިސްޓްރޭޝަން އަހުމަދު ފާއިޒު އަދި ޑިރެކްޓަރ ފޮރިން ރިލޭޝަންސް ޒުއްޔިނާ ބަދުރީގެ ބައެއް ނިންމުންތަކާ ދެކޮޅަށް އަޅުގަނޑު ވާހަކަ ދައްކާފައިވާތީ, ޒާތީ ހަސަދަވެރިކަން ފިލުވުމަށްކަމަށް ދެކެމެވެ. އަދި ބެކް ޑޭޓްކޮށް ބައެއް ޕްރޮކިއުމަންޓް ރިކުއެސްޓްތަކުގައި ސޮއި ކުރުމަށް ދެކޮޅު ހަދާފައިވާތީ ކަމަށް ދެކެމެވެ.
އޭނާ ވަނީ މި މައްސަލަ ވަޒީފާއާބެހޭ ޓްރައިބިއުނަލްއަށާއި ހިއުމަން ރައިޓްސް ކޮމިޝަން އަދި މަޖިލީހުގެ އާންމު ކޮމިޓީއަށް ހުށަހެޅުމަށް ނިންމާ އެކަން ވެސް އާންމުކޮށްފަ އެވެ.
ޒިޔާއު މަޖިލީހުގެ އިދާރާގައި މަސައްކަތްކުރާތާ މިހާރު ވަނީ 5 އަހަރު ވެފަ އެވެ. އޭގެ ކުރިން އޭނާ ވަނީ 13 އަހަރު ޓީވީއެމްގައި މަަސައްކަތްކުރައްވާފަ އެވެ. ޓީވީއެމުން އިސްތިއުފާ ދެއްވި އިރު ޒިޔާއު ހުންނެވީ އެ ސްޓޭޝަންގެ މެނޭޖަރެއްގެ މަގާމުގަ އެވެ.
