އެކަނިވެރި މައިންނާއި އެކަނިވެރި ބަފައިންނަށް ދެމުން އަންނަ އެލަވަންސް، ކޮންމެ ދަރިއަކަށް މަހަކު 3،000 ރުފިޔާގެ ރޭޓުން އަންނަ އަހަރުގެ ޖެނުއަރީ މަހުން ފެށިގެން ބޮޑުކުރައްވާނެ ކަމަށް ރައީސް ޑރ. މުހައްމަދު މުއިއްޒު  ވިދާޅުވެއްޖެ އެވެ.

ރައީސް އެކަން އިއުލާނު ކުރެއްވީ ލ.ގަމު ރައްޔިތުންނާއި ބައްދަލުކުރެއްވުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ އެކަނިވެރިމައިންނަށް ދައުލަތުން ދެމުން އަންނަ އެލަވަންސް ބޮޑުކުރަން ނިންމަވާފައިވާ ކަމަށެވެ. އެ ގޮތުން އެ އެލަވަންސް އަންނަ އަހަރުން ފެށިގެން ބޮޑު ކުރައްވާނެ ކަމަށް ވިދާޅުވި އެވެ. މިގޮތަށް މި ފައިސާ ލިބެންޖެހޭ 5,878 ފަރާތެއް އެބަތިބި ކަމަށް ރައީސް ވިދާޅުވި އެވެ.

މިހާރު އެކަނިވެރި މައިން ނުވަތަ ބަފައިންނަށް އެއް ކުއްޖަކަށް ލިބެމުން އަންނަނީ 2،000 ރުފިޔާގެ އެލަވަންސެކެވެ. އަދި އެއް ކުއްޖަކަށްވުރެ ގިނަ ނަމަ، ކޮންމެ ކުއްޖަކަށް 1،000 ރުފިޔާގެ ރޭޓުންނެވެ. އަންނަ އަހަރުން ފެށިގެން މި އަދަދު އިތުރުކޮށް، ކޮންމެ ދަރިއަކަށް 3،000 ރުފިޔާ ލިބޭގޮތަށް ހަމަޖެހިގެންދާނެ އެވެ. ނަމަވެސް ޖުމްލަ އަދަދު 12،000 ރުފިޔާއަށްވުރެ އިތުރުނުވާ ގޮތަށް މި އެލަވަންސް ދެވޭނެ އެވެ.

މީގެއިތުރުން ތެލަސީމިއާ ޕޭޝަންޓުންނަށް ދޭ އެލަވަންސްގެ ގޮތުގައި، ތެލަސީމިއާ ބަލީގެ ކޮންމެ ޕޭޝަންޓަކަށް 1000 ރުފިޔާގެ މަގުން ޖުމުލަ 11.7 މިލިޔަން ރުފިޔާ ބަޖެޓުގައި ހިމަނުއްވާނެ ކަމަށް ވެސް އެމަނިކުފާނު ވިދާޅުވި އެވެ.