ރާއްޖޭގެ އެކި ސަރަޙައްދުތަކުގައި ކުރިއަށްގެންދާ ބިން ހިއްކުމުގެ މަޝްރޫއުތަކުގެ މަސައްކަތް އަވަސްކުރުމަށް އެމްއޭސީއެލް އާ ގުޅިގެން ތިން ޑްރެޖަރެއް ގެނައުމުގެ މަސައްކަތް ކުރައްވަމުންގެންދަވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ށ. ކޮމަންޑޫ ރައްޔިތުންނާ ބައްދަލުކުރެއްވައި ވާހަކަފުޅު ދައްކަވަމުންނެވެ.
ރާއްޖޭގެ ގިނަ ރަށްތަކަށް ދިމާވެފައިވާ ބިމުގެ ދަތިކަން ހައްލުކުރުމަށް ރަށްތަކުގެ ބިން ހިއްކުމާއި ހައުސިންގ އަދި އެއާޕޯޓް ގެ މަޝްރޫއުތައް ވެސް ކުރިއަށްދާއިރު، މީގެ ތެރެއިން ބިން ހިއްކުމުގެ ގިނަ މަސައްކަތްތައް ހަވާލުކޮށްފައި ވަނީ އެމްޓީސީސީއާ އެވެ. އެކަމަކު ބައެއް މަސައްކަތްތައް އެމްއޭސީއެލްއާ ވެސް ހަވާލުކޮށްފައިވާއިރު ރައީސް ވިދާޅުވީ ސަރުކާރުގެ ކޮންމެ ކަމެއް ކުރަނީ ވެސް ޕްލޭނެއް އޮވެގެން ކަމަށާއި ބިން ހިއްކުމުގެ ހުރިހާ މަޝްރޫއުއެއް ވެސް ކުރިއަށް ގެންދާނީ އެއްފަހަރާ ކަމަށެވެ.
އެގޮތުން ބިން ހިއްކުމުގެ މަޝްރޫތައް އެއްފަހަރާ ބާރު ސްޕީޑުގައި ކުރިއަށް ގެންދިއުމަށް އެމްއޭސީއެލް އިން ތިން ޑްރެޖަރު ގެނައުމަށް ނިންމާފައިވާކަން އެމަނިކުފާނު އިއުލާންކުރެއްވި އެވެ. އެގޮތުން މި މަސް ނިމުމުގެ ކުރިން 11،000 ޓަނުގެ ޑްރެޖަރެއް ރާއްޖެ ގެނެވޭނެކަމަށާއި ނޮވެމްބަރު މަހުގެ ތިންވަނަ ހަފްތާގައި 40،000 ޓަނުގެ އިތުރު ޑްރެޖަރެއް ރާއްޖެ ގެނެވޭނެ ކަމަށާއި ތިންވަނަ ޑްރެޖަރު މި އަހަރުގެ ޑިސެމްބަރު މަހުގެ ތެރޭގައި ރާއްޖެ ގެނެވޭނެކަން ރައީސް ހާމަކުރެއްވި އެވެ.
އެމަނިކުފާނު ވިދާޅުވިގޮތުގައި ފުރަތަމަ ގެންނަ 11،000 ޓަނުގެ ޑްރެޖަރުން އެންމެ ފުރަތަމަ މަސައްކަތް ކުރާނީ ތ. ވިލުފުށީގެ ބިން ހިއްކުމުގެ މަޝްރޫއުގައި އެވެ. 45،000 ޓަނުގެ ޑްރެޖަރުން އެންމެ ފުރަތަމަ މަސައްކަތް ކުރާނީ ރަސްމާލެ ހިއްކުމުގެ މަޝްރޫއުގަ އެވެ. އަދި، ތިން ވަނަ ޑްރެޖަރުގެ މަސަތްކަތް ފަށާނީ ހއ. ދިއްދޫގެ ޕްރޮޖެކްޓްގައި އެވެ.
މީގެއިތުރުން، ހުޅުމާލޭ ފޭސް 3 އާއި ގިރާވަރުފަޅާއި އުތުރުތިލަފަޅު ހިއްކުމަށް އިތުރު ޑްރެޖަރުތަކެއް ގެނައުމަށް އެހެން ކުންފުންޏަކާއެކުވެސް އެއްބަސްވުމެއް ވެފައިވާ ކަމަށް ރައީސް ހާމަކުރެއްވި އެވެ. ރަށްރަށުގެ ތަރައްގީގެ މަސައްކަތްތައް ކުރިއަށްދަނީ ވަރަށް ބޮޑަށް ރާވައިގެން، ގިނަ އިދާރީ މަސައްކަތްތަކެއް ކޮށްގެން ކަމަށްވެސް ރައީސް ވިދާޅުވި އެވެ.
އެމްއޭސީއެލްއިން މިހާރު އޮތީ ބިން ހިއްކުމާއި އުމްރާނީ މަސައްކަތްތަކަށް ހާއްސަ ކުންފުންޏެއް ވެސް އުފައްދައިފަ އެވެ. އެ ކުންފުނީގެ 100 ޕަސެންޓް ހިއްސާ އޮންނަ ގޮތަށް މި މަހުގެ 6 ގައި އުފެއްދި ކުންފުނީގެ ނަމަކީ ޕެނިންސިއުލާ އިންފްރާސްޓްރަކްޗާ އެވެ.
