ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ތަރައްގީކޮށް ބަލަހައްޓަމުން ގެންދާ ސޯޝަލް ހައުސިން ފްލެޓުތައް ކުއްޔަށް ދޭނަމަ، ފިޔަވަޅު އަޅާނެ ކަމަށް އެ ކުންފުނިން ބުނެފި އެވެ.
ސަރުކާރުގެ ސޯޝަލް ހައުސިން ސްކީމްތަކުން ދޫކުރާ ފްލެޓުތައް އެހެން މީހުންނަށް ކުއްޔަށް ދޭ މައްސަލަ ވަނީ ބޮޑުވެފަ އެވެ. މިކަން ހުއްޓުވުމަށްޓަކައި ގާނޫނެއް ވެސް އެކުލުމުގެ މަސައްކަތް ކުރެވެމުންދާއިރު ފަހި ދިރިއުޅުން ކޯޕަރޭޝަނުން ވެސް ވަނީ އެކަން ހުއްޓުވާނެ ކަމަށް ބުނެފަ އެވެ.
މި މައްސަލައާ ގުޅިގެން އެޗްޑީސީން ނެރުނު ބަޔާނެއްގައި ބުނެފައިވަނީ ސޯޝަލް ހައުސިން ސްކީމަކީ ބޯހިޔާވަހިކަމުގެ ތަނަވަސްކަމެއް ނެތް ފަރާތްތަކަށް ބޯހިޔާވަހިކަން ފޯރުކޮށްދިނުމަށް ހިންގާ ސްކީމަކަށްވާއިރު، އެ ފްލެޓުތައް އެހެން ފަރާތްތަކަށް ކުއްޔަށް ދިނުމަކީ އެ ކުންފުންޏާއި ފްލެޓު ލިބޭ ފަރާތާއި ދެމެދު ވާ އެއްބަސްވުމާ ޚިލާފު ކަމެއް ކަމަށެވެ.
މިކަން ފާހަގަކޮށް އެޗްޑީސީން ވަނީ އެގޮތަށް ފްލެޓުތައް ކުއްޔަށް ދޫކޮށްފައިވޭތޯ އެ ކޯޕަރޭޝަނުން ބަލަމުންގެންދާނެ ކަމަށް ބުނެފަ އެވެ. އަދި އެއްބަސްވުމާ ޚިލާފަށް އެހެން ފަރާތްތަކަށް ފްލެޓު ކުއްޔަށް ދީފައިވާނަމަ، އެ ފަރާތްތަކާ މެދު އެއްބަސްވުމުގައި ކަނޑައަޅާފައިވާ ފިޔަވަޅު އަޅާނެ ކަމަށެވެ.
