ބްރޯޑްކާސްޓަރެއްގެވެސް އަމާޒަކަށް ވާން ވާނީ، އިސްލާމީ އޮނިގަނޑަށް ފެތޭ، ދިވެހިވަންތަ، މަންފާހުރި މައުލޫމާތާއި ޕްރޮގްރާމްތައް އުފައްދައި ގެނެސްދިނުންކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ގައުމީ ބްރޯޑްކާސްޓިންގ ދުވަހާ ގުޅިގެން ކުރެއްވި ހާއްސަ ޕޯސްޓެއްގަ އެވެ. މި މުނާސަބަތުގައި ރައީސް ވަނީ ބްރޯޑްކާސްޓިންގ ދާއިރާގެ އެންމެހައި މަސައްކަތްތެރިންނަށް ތަހުނިޔާ އަރިސްކުރައްވާފަ އެވެ. އަދި ބްރޯޑްކާސްޓް ކުރުމުގައި ކުރެވޭ އެންމެހައި މަސައްކަތްތަކަކީ ހީވާގިކަމާއި ޒިންމާދާރުކަމާއެކު ކުރަންޖެހޭ މުހިންމު މަސައްކަތްތަކެއްކަން ފާހަގަކުރެއްވި އެވެ.
މުޖުތަމައުގައި މީޑިއާގެ ދައުރުގެ މުހިންމުކަން ފާހަގަކުރައްވަމުން، ރައީސް ވިދާޅުވީ ބްރޯޑްކާސްޓަރުންނަކީ ގައުމަށް ހެޔޮ ނަމާއި ޝަރަފު ހޯދައިދިނުމުގައި މުހިންމު ދައުރެއް އަދާކުރާ ފަރާތްތަކެއްގެ ގޮތުގައި ތިބެންޖެހޭނެ ކަމަށެވެ.
މީގެއިތުރުން، ރާއްޖޭގެ ބްރޯޑްކާސްޓިންގ ދާއިރާ ދުވަހަކުން ދުވަހަކަށް ތަރައްގީވަމުންދާއިރު، މި ދާއިރާއިން ގައުމަށް ފޯރުކޮށްދޭ ހިދުމަތްތަކުގެ ފެންވަރު މަތިކޮށް، ޒަމާނީ ޓެކްނޮލޮޖީގެ ބޭނުން އެންމެ ފުރިހަމަ ގޮތުގައި ހިފައިގެން ކުރިއަށް ދިއުމަށްވެސް ރައީސް ގޮވާލެއްވި އެވެ.
