ރާއްޖޭގައި ޝީޝާ މަނާކުރުމަށް މޯލްޑިވްސް މެޑިކަލް އެސޯސިއޭޝަން (އެމްއެމްއޭ) އިން މިއަދު ގޮވާލައިފި އެވެ.
މެޑިކަލް އެސޯސިއޭޝަނުން މިއަދު ނެރުނު ބަޔާނެއްގައި ވަނީ ދުންފަތް ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތްތަކަށް ތައުރީފުކޮށް، އެއީ ކުރިމަގުގެ ޖީލުތަކުގެ ސިއްހަތު ރައްކާތެރިކުރުމަށް ކުރެވޭ މުހިންމު އިންވެސްޓްމަންޓެއްކަމުގައި ފާހަގަކޮށްފަ އެވެ.
އެގޮތުން، މިދިޔަ އަހަރުން ފެށިގެން ރާއްޖޭގައި ވޭޕް މަނާކުރުމާއި ދުންފަތުގެ ބާވަތްތައް ވިއްކާ އުމުރު މަތިކުރުމާއި އެކަމުން ދުރުވުމަށް ސިޒޭޝަން ކްލިނިކްގެ ހިދުމަތް ފުޅާކުރުން އަދި ދުންފަތުގެ ބާވަތްތައް އިސްތިހާރުކުރުން މަނާކުރުމުގެ ފިޔަވަޅުތަކަށް އެ އެސޯސިއޭޝަނުން ވަނީ މަރުހަބާ ކިޔާފަ އެވެ.
އެ އެސޯސިއޭޝަނުން ވަނީ މިހާރު އަމަލުކުރަމުންދާ ގާނޫނުތަކާއި ގަވާއިދުތައް ހަރުދަނާކޮށް ތަންފީޒުކުރުމާއި، އާންމުން ހޭލުންތެރިކުރުވުމުގެ ޕްރޮގްރާމްތައް ފުޅާކުރުމާއި، ދުންފަތުގެ އެކި ބާވަތްތަކުގެ ރަހަތައް މަނާކުރުމަށް ގޮވާލާފަ އެވެ. އަދި ރާއްޖޭގަ ޝީޝާގެ އިސްތިއުމާލު ކުރުން މުޅިން މަނާކުރުމަށް ވެސް އެ އެސޯސިއޭޝަނުން ވަނީ ގޮވާލާފަ އެވެ.
ދުންފަތުގެ އިސްތިއުމާލު ކުރުމާ ގުޅުންހުރި ކަންކަމުގެ އިތުރުން، ގައިން ގަޔަށް ނާރާ ބަލިތައް ކޮން ކޮންޓްރޯލްކުރުމަށް ވެސް އިތުރު ހުށަހެޅުންތަކެއް އެ ބަޔާނުގައި ހިމަނާފައިވެ އެވެ. އޭގެތެރޭގައި ހިމެނެނީ ކާބޯތަކެތީގެ ނިއުޓްރިޝަނަލް ލޭބަލްތައް ތައާރަފުކުރުމާއި، ސިއްހަތަށް ގެއްލުން ހުރި ކާބޯތަކެތިން ނަގާ ޓެކްސް އިތުރުކުރުމެވެ.
