ސުމޫދު ފުލޮޓިއްލާ އިޒްރޭލުގެ އިންޒާރުތަކަށް ބެލުމެއްނެތި ގާޒާއަށް މިސްރާބު ޖަހައިފި އެވެ.
އިޒްރޭލުން ގައްޒާގައި ހިންގަމުންދާ ނޭއްގާނީ އަމަލުތަކާ ދެކޮޅަށް، މަސައްކަތްކޮށް ގައްޒާއަށް އިންސާނީ އެހީ އަދި ކާބޯތަކެތި ފޯރުކޮށްދިނުމަށް މަސަތްކަތްކުރާ ސުމޫދު ފުލޮޓިއްލާ އިން ދަނީ އިސްރާއީލުގެ އިންޒާރުތަކަށް ބެލުމެއްނެތި ޔެލޯ ލައިން ހުރަސްކޮށް، ގައްޒާއާ ދިމާލަށް ކުރިއަށް ދަތުރުކުރަމުން ނެވެ. ސުމޫދު ފުލޮޓިއްލާގެ އުޅަނދުތައް ދެ ދުވަސް ތެރޭގައި ގާޒާއަށް ފޯރާނެ ކަމަށް ބެލެވެ އެވެ.
ސުމޫދް ފްލޮޓިއްލާގެ އުޅަނދުތައް ގައްޒާއަށް ދަތުރު ފަށާފައި ވަނީ މި ހިނގާ ސެޕްޓެންބަރު މަހުގެ ކުރީކޮޅެވެ. އެހިސާބުން ފެށިގެން އިޒްރޭލުގެ އަސްކަރިއްޔާއިން އަންނަނީ ސުމޫދު ފުލޮޓިއްލާއަށް އެކި ފަހަރު މަތިން އިންޒާރުދީ، ބިރުދައްކާ އަދި އެމީހުންނަށް ހުރަސް އަޅަމުން ނެވެ. އެހެންނަމަވެސް، ސުމޫދު ފުލޮޓިއްލާއިން އެ އިންޒާރު ތަކަށް ނުބަލާ ވަނީ ރީނދޫ ލައިން ހުރަސްކޮށްފަ އެވެ.
އިޒްރޭލުން ސުމޫދު ފުލޮޓިއްލާއަށް ބިރު ދެއްކުމުގެ ގޮތުން އުޅަނދުތަކަށް ޑުރޯން ހަމަލާދީ، މުއާސަލާތީ ހިދުމަތްތައް ކަނޑާލާ، ގައްޒާގެ ކަނޑުގެ ސަރަހައްދަށް ނުވަނުމަށް އިންޒާރު ދީފައިވެ އެވެ.
މި ހަރަކާތުގައި ދުނިޔޭގެ އެކި ކަންކޮޅުތަކުން މީހުން ބައިވެރިވެފަވާއިރު، ރާއްޖޭގެ ފަރާތުން ހަރަކާތްތެރިވަމުންދާ އިންޓަނޭޝަނަލް އެއިޑް ކެމްޕެއިން (އައިއޭސީ) އިން ދަނީ ގާޒާގައި ރިލީފްގެ މަސައްކަތްތައް ކުރަމުންނެވެ. އެ ޖަމިއްޔާއިން ދަނީ ކާބޯތަކެއްޗާ ފެން ބެހުމާއި، ހޮސްޕިޓަލްތަކަށް އެހީތެރިވުމާއި، ގާޒާގައި އިޒްރޭލުން ހިންގަމުންދާ ނޭއްގާނީ އަމަލުތަކަށް ދުނިޔެ ހޭލުންތެރިކުރަމުންނެވެ. އަދި ފްލޮޓިލާގެ ބައިވެރިން ރައްކާތެރިކަމާއެކި ގާޒާއަށް ވާސިލުކުރުމަށް ވެސް އައިއޭސީން ދަނީ ވަކާލާތު ކުރަމުންނެވެ.
މީގެއިތުރުން އައިއޭސީން ދަނީ ގައްޒާގައި އިންސާނީ އެހީތެރިކަން ފޯރުކޮށްދީ، ގެދޮރު ގެއްލިފައިވާ އާއިލާތަކަށް އެހީތެރިވެދެމުން ނެވެ. އެގޮތުން 2024 ވަނަ އަހަރުގެ މެއި މަހުގެ 30 ވަނަ ދުވަހުން ފެށިގެން އައިއޭސީން ގާޒާއަށް ދުވާލަކު 12،000 ލީޓަރުގެ ފެން ފޯރުކޮށްދެ އެވެ. އަދި ހޮސްޕިޓަލްތަކާއި ޒަރޫރީ ހިދުމަތްތައް ފޯރުކޮށްދިނުމަށްޓަކައި 20،000 ލީޓަރުގެ ފިއުލް ހަދިޔާކޮށް، މީލް ޕެކް ވެސް ބަހާފައިވެ އެވެ. ކޭމްޕްތަކާއި ކޮމިއުނިޓީ ސެންޓަރުތަކުގައި ގެދޮރު ގެއްލިފައިވާ ފަލަސްތީނުގެ ރައްޔިތުންނަށް ވަނީ 100،000 އެމެރިކާ ޑޮލަރު ނުވަތަ 1.5 މިލިއަން ރުފިޔާގެ މާލީ އެހީތެރިކަން ފޯރުކޮށްދީފަ އެވެ.
ސުމޫދް ފުލޮޓިއްލާގައި 40އެއްހާ އުޅަނދު ހިމެނޭއިރު އުޅަނދުތަކުގައި ގައްޒާއަށް ދަތުރު ކުރާ މީހުންގެ ތެރޭގައި އިންސާނީ ހައްގުތަކަށް ވަކާލާތު ކުރާ އެކްޓިވިސްޓުންނާއި، ވިލާތުގެ ގައުމުތަކުގެ ގާނޫނު ހަދާ މަޖިލީހުގެ ބައެއް މެންބަރުން ވެސް ހިމެނެއެވެ.
މިހާރުވެސް އެ އުޅަނދުތައް އޮތީ ޒަޔަނިސްޓުންގެ ހަމަލާއެއް އަމާޒުވެދާނެފަދަ ހިސާބެއްގައިކަމަށްވާތީ އެ އުޅަނދުތަކުގެ ހިމާޔަތާއި ރައްކާތެރިކަން ކަށަވަރު ކޮށްދިނުމަށް ސްޕެއިނާއި، އިޓަލީ، ގްރީސް އަދި ތުރުކީން ދަނީ އަސްކަރީ އެހީ ފޯރުކޮށްދެމުންނެވެ.
އެ އުޅަނދުތައް މި ވަގުތު ދަތުރު ކުރަމުން ދަނީ މެޑިޓެރޭނިޔަން ކަނޑުން އިރަށެވެ. އެއާއެކު އިޒްރޭލުން އަންނަނީ ގާޒާގެ ކަނޑުގެ ސަރަހައްދަށް ނުވަނުމަށް އިންޒާރު ދެމުންނެވެ.
