ބާރުގަދަ ގައުމުތަކަށް ގާނޫނު ނުހިންގޭތީ ދުނިޔޭގެ ނިޒާމަށް އޮތް އިތުބާރު ދަނީ ގެއްލެމުންކަމަށް ދިވެހި ސަރުކާރުން އދ.ގެ އާއްމު މަޖިލީހުގައި ބުނެފި އެވެ.
އެމެރިކާގެ ނިއު ޔޯކުގައި މިހާރު ކުރިއަށް ގެންދާ އދ. ގެ އާންމު މަޖިލީހުގެ ބަހުސްގައި ރާއްޖޭގެ ފަރާތުން ދެއްވި ބަޔާނުގައި، ފޮރިން މިނިސްޓަރު ޑރ. އަބްދުﷲ ހަލީލް ވަނީ ހަމަހަމަކަމާ އެކު އދ. ގެ މެމްބަރު ގައުމުތަކުގެ މައްޗަށް ބައިނަލްއަގުވާމީ ގާނޫނުތައް ނުހިންގޭ ކަމުގެ ކަންބޮޑުވުން ފާޅުކުރައްވާފަ އެވެ.
އެގޮތުން، މިސާލެއްގެ ގޮތުގައި ހަލީލް ނެންގެވީ، ފަލަސްތީނުގައި އެއްވެސް ޖެހިލުމެއް ނެތި އިޒްރޭލުން ފާޅުކަން ބޮޑު ގޮތެއްގައި ހިންގަމުންދާ ގަތުލު އާއްމެވެ. މިގޮތުން، އިޒްރޭލުން ތަކުރާރުކޮށް ބައިނަލްއަގުވާމީ ގާނޫނުތައް މުގުރާލައި، އދ.އިން ފާސްކޮށްފައިވާ އެތަކެއް ގަރާރުތަކާއި ބައިނަލްއަގުވާމީ ކޯޓުތަކުން ނެރެފައިވާ އަމުރުތަކާ ހިލާފަށް ކަންތައްކުރާ ކަމަށް މިނިސްޓަރު ފާހަގަކުރެއްވި އެވެ.
