ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީމުއަތޮޅުގެ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅު ވޭވަށަށް ވަޑައިގެން އެ ރަށުގެ ކައުންސިލް އިދާރާ ހުޅުވައިދެއްވާ އެހެން މަޝްރޫއުތަށވެސްް ފައްޓަވައި ދެއްވައިފި އެވެ.

މ. ވޭވަށުގެ ކައުންސިލް އިދާރާ ހުޅުވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. އަރިހުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރާއި، ދާއިރާގެ މެންބަރާއި، އެރަށުގެ ކައުންސިލްގެ ރައީސް، ބައިވެރިވެވަޑައިގެންނެވި އެވެ.

މި މަސައްކަތަކީ، ބާވެ ވީރާނާވެފައިވާ ކައުންސިލް އިދާރާތަކުގެ ޢިމާރާތްތައް ތަރައްގީކުރުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން އިމާރަތް ކުރެވުނު ތަނެކެވެ. މި ސަރުކާރުގެ އަމާޒަކީ މި ފަސް އަހަރުގެ ތެރޭގައި 100 އަށްވުރެ ގިނަ ރަށުގެ ކައުންސިލް އިދާރާގެ އައު ޢިމާރާތްތައް ތަރައްޤީކުރެއްވުމެވެ.

ވޭވަށުގައި ރައީސް ފައްޓަވާދެއްވި އިތުރު މަޝްރޫއުތަކުގެ ތެރޭގައި، މ. ވޭވަށުގައި ގާއިމްކުރާ ޕޮލިސް ސްޓޭޝަން ގެ ބިންގާއެޅުމާއި، އެ ރަށު ފިޓްނެސް އެންޑް ރެކްރިއޭޝަން ސެންޓަރް ގެ ބިންގާއެޅުމުގެ ރަސްމިއްޔާތު ހިމެެނެ އެވެ.

ޕޮލިސް ސްޓޭޝަންގެ ބިންގާ އަޅުއްވައިދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު، ޢަލީ އިޙްސާނެވެ. އަރިހުގައި ކޮމިޝަނަރ އޮފް ޕޮލިސް އިސްމާޢީލް ނަވީން އަދި  ވޭވަށު ކައުންސިލްގެ ރައީސް ބައިވެރިވަޑައިގެންނެވި އެވެ.

ފިޓްނެސް އެންޑް ރެކްރިއޭޝަން ސެންޓަރް ގެ ބިންގާ އަޅުއްވައިދެއްވީ، މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އަބްދުﷲ ރާފިއު، ދާއިރާގެ މެމްބަރު އަދި ވޭވަށު ކައުންސިލުގެ ރައީސް އެވެ.