ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް ހޯމަ ދުވަހު ބާއްވަން ތައާވަލްކޮށްފިއެވެ.
މަޖިލީހުގެ އިދާރާއިން މީޑިއާތަކަށް ފޮނުއްވި މެސެޖެއްގައި ބުނީ، ރައްޔިތުންގެ މަޖިލީހުގެ ގަވާއިދުގެ 45 ވަނަ މާއްދާގެ ދަށުން ދައުރުން ބޭރުން ޖަލްސާއެއް ބާއްވައި ދިނުމަށް ހުށަހެޅުމެއް ލިބިފައިވާ ކަމަށެވެ. އެ ހުށަހެޅުމާ އެއްގޮތަށް މި މަހުގެ 15 ވާ ހޯމަ ދުވަހު ޖަލްސާ އެއް ބޭއްވުމަށް ނިންމާފައިވާ ކަމަށް އެއިދާރާއިން ބުނެފައި ވެއެވެ.
ދައުރުން ބޭރުން ބާއްވާ ޖަލްސާގެ އެޖެންޑާ އަދި ހާމައެއް ނުކުރެއެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ މަސައްކަތް ނިންމައި، ޗުއްޓީއަށް ގޮސްފައިވަނީ މިދިޔަ މަހުގެ 20ވަނަ ދުވަހުއެވެ.
ޗުއްޓީގައި އޮތް ނަމަވެސް މިވަގުތު މަޖިލީހުގެ މިނިވަން މުއައްސަސާތަކުގެ ކޮމިޓީން ދެ ބިލެއްގެ މަސައްކަތް ކުރިއަށް ގެންދެއެވެ. އެއީ ރައްޔިތުންގެ އާންމު ވޯޓުނެގުމާ ގުޅޭގޮތުން ހުށަހަޅުއްވާފައިވާ ބިލާއި މީޑިއާ ރެގިއުލޭޓް ކުރުމާ ގުޅޭ ބިލުގެ މަސައްކަތެވެ.
