މާލޭގެ އުތުރު ބަނދަރު ތަރައްޤީކުރުމުގެ މަޝްރޫޢުގެ ތެރެއިން ކުރިއަށްދާ ފިންގަރ ޖެޓީތައް އެޅުމުގެ މަސައްކަތުގެ ބޮޑުބައެއް ނިމުމަކާ ގާތްވެ، 15 މީޓަރުގެ ޖެޓީތަކުގެ ކޮލަމް އެޅުމުގެ މަސައްކަތް އަންނަ ހަފުތާގެ ނިޔަލަށް އެއްކޮށް ނިންމާލެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

އެމްޓީސީސީން ހާމަކުރި ގޮތުގައި، ޖެޓީތަކަށް ބޭނުންވާ ދަގަނޑު ބަނުމުގެ މަސައްކަތްތައް ބާރަށް ކުރިއަށްދާއިރު، އަންނަ ހަފުތާގެ ތެރޭގައި ކޮންކްރީޓް އެޅުމުގެ މަރުޙަލާ ފެށިގެންދާނެއެވެ. މިއީ އެ ސަރަޙައްދުގެ ބަނދަރުގެ ޖާގަ ތަނަވަސްކޮށް، ދަތުރުފަތުރުގެ ނިޒާމު ހަރުދަނާކުރުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.

މި މަޝްރޫއުގެ ދަށުން ޖުމްލަ 6 ފިންގަރ ޖެޓީ ޤާއިމުކުރުމަށް ވަނީ ނިންމާފައެވެ. އޭގެ ތެރޭގައި ހިމެނެނީ 25 މީޓަރުގެ ދިގުމިން އަދި 61 މީޓަރުގެ ފުޅާމިން ހުންނަ 3 ޖެޓީގެ އިތުރުން، 15 މީޓަރު ދިގު އަދި 6 މީޓަރު ފުޅާ 3 ޖެޓީއެވެ.

އުތުރު ބަނދަރަކީ އަތޮޅުތަކުން މާލެއަށް މީހުންނާއި މުދާ އުފުލުމުގައި އެންމެ ބާރުބޮޑު އެއް ސަރަޙައްދަށް ވުމާއެކު، މި ޖެޓީތައް ނިމުމުން އެތަނުގެ ތޮއްޖެހުމަށް ބޮޑު ލުޔެއް ލިބިގެންދާނެއެވެ. ޚާއްސަކޮށް، ބަނދަރުގައި ޖާގަ ނެތުމުގެ ސަބަބުން ބޭރުގައި އަޅާފައި އޮންނަ ލޯންޗުތަކަށް އެރުމަށް އެއް އުޅަނދުން އަނެއް އުޅަނދަށް ހުރަސްކުރަން ޖެހުމުން ރައްޔިތުން އުފުލަމުންދިޔަ ބުރައަށް ދާއިމީ ޙައްލެއް ލިބޭނެއެވެ.

އެމްޓީސީސީން ފާހަގަކުރާ ގޮތުގައި، މީގެ ސަބަބުން ކުޑަކުދިންނާއި ދޮށީ އުމުރުގެ މީހުންނަށް ދަތުރުކުރުމުގައި ބޮޑެތި ފަސޭހަތަކެއް ލިބި، ބުރަ ތަކެތި ހިފައިގެން ދަތުރުކުރާ ފަރާތްތަކަށް ރައްކާތެރިކަން ކަށަވަރުވެގެންދާނެއެވެ. އަދި އެއްފަހަރާ ގިނަ ލޯންޗުފަހަރަށް ފަސޭހަކަމާއެކު ކައިރިކުރެވޭނެ އިންތިޒާމު ހަމަޖެހުމުން، ލަސްވުމެއްނެތި ދަތުރުތައް އަވަސްވެގެންދާނެ ކަމަށްވެސް އެ ކުންފުނިން ވިދާޅުވެއެވެ.

1980 ވަނަ އަހަރު އުފެދުނު އެމްޓީސީސީއަކީ ވޭތުވެދިޔަ 45 އަހަރު ދުވަހުގެ ތެރޭގައި ރާއްޖޭގެ އެކި ކަންކޮޅުތަކުގައި ބަނދަރު ހެދުމާއި، ބިން ހިއްކުމާއި، ޢުމްރާނީ ތަރައްޤީގެ އެތައް މަޝްރޫޢެއް އިތުބާރާއެކު ކާމިޔާބުކަމާއެކު ނިންމައިދީފައިވާ ޤައުމީ އެންމެ ބޮޑު ކޮންޓްރެކްޓިން ކުންފުންޏެވެ.