ދިވެހި ސަރުކާރުން އަދާކުރަންޖެހޭ 50 މިލިއަން އެމެރިކާ ޑޮލަރުގެ ޓްރެޒަރީ ބިލެއް ދައްކައި ޚަލާސްކޮށްފައިވާ ކަމަށާއި، މި ފައިސާ ދެއްކި ނަމަވެސް ރާއްޖެއަށް ބޭނުންވާ ތެލާއި، ކާޑުގެ ބާވަތްތަކުގެ އިތުރުން ބޭސްފަރުވާއަށް ބޭނުންވާ ތަކެތި މެދުނުކެނޑި ލިބޭނެ އިންތިޒާމުތައް ފުރިހަމައަށް ހަމަޖެހިފައިވާ ކަމުގެ ޔަޤީންކަން މިނިސްޓްރީ އޮފް ފިނޭންސް އިން ރައްޔިތުންނަށް އަރުވައިފިއެވެ.
މިއަދު ދައްކައި ނިންމާލި 50 މިލިއަން ޑޮލަރަކީ، 2019 ވަނަ އަހަރު ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް ކުރީގެ ރައީސް އިބްރާހިމް މުޙައްމަދު ސާލިހުގެ ސަރުކާރުން ބަޖެޓް ސަޕޯޓަށް އެކި ފަހަރު މަތިން ނަގާފައިވާ ޖުމްލަ 150 މިލިއަން ޑޮލަރުގެ ފެސިލިޓީގެ އެންމެ ފަހު އިންސްޓޯލްމަންޓެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ މި ފެސިލިޓީގެ ތެރެއިން 2024 ވަނަ އަހަރުގެ ޖެނުއަރީ މަހު 50 މިލިއަން ޑޮލަރު އަދި ހުސްވި މޭ މަހުގެ 11 ވަނަ ދުވަހު އިތުރު 50 މިލިއަން ޑޮލަރު ދައްކާފައެވެ. މިއަދު ދެއްކި ފަހު 50 މިލިއަން ޑޮލަރާއެކު، ކުރީ ސަރުކާރުން ނެގި މި ބޮޑު ދަރަނި މިހާރު ވަނީ އެއްކޮށް ދައްކައި ނިންމާފައެވެ.
ފިނޭންސް މިނިސްޓްރީން ވިދާޅުވި ގޮތުގައި، ދަރަނި އަދާކުރުމުގެ ސަބަބުން ރާއްޖެއަށް ބޭނުންވާ ޒަރޫރީ މުދާ އެތެރެކުރުމަށް ބޭނުންވާ ބޭރު ފައިސާ ހޯދުމުގައި އެއްވެސް ދަތިކަމެއް ނާންނާނެއެވެ. އަދި ތެލާއި، ކާޑުގެ ބާވަތްތަކާއި، ޒަރޫރީ ބޭހުގެ އިތުރުން ރައްޔިތުންނަށް ބޭނުންވާ އަސާސީ ޚިދުމަތްތައް މެދުނުކެނޑި ފޯރުކޮށްދިނުމަކީ ސަރުކާރުން އެންމެ އިސްކަންދޭ އެއް ކަންތައް ކަމުގައި އެ މިނިސްޓްރީން ފާހަގަކުރިއެވެ. އެހެންކަމުން، މި ފައިސާ ދެއްކުމާ ގުޅިގެން މުދާ އެތެރެކުރުމަށް ދަތިތަކެއް ކުރިމަތިވެދާނެ ކަމަށް ބުނެ ބައެއް ފަރާތްތަކުން ފަތުރަމުންދަނީ އެއްވެސް އަސާސެއް ނެތް ދޮގު ވާހަކަތަކެއް ކަމަށް ބުނެ ފިނޭންސް މިނިސްޓްރީން ވަނީ އެކަން ހަރުކަށި އިބާރާތުން ދޮގުކޮށްފައެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެންމެ ފަހުގެ ހިސާބުތަކުން ދައްކާ ގޮތުގައި، މިދިޔަ އޯގަސްޓް މަހުގެ ނިޔަލަށް ރާއްޖޭގެ ރަސްމީ ރިޒާވް ހުރީ ގާތްގަނޑަކަށް 644 މިލިއަން އެމެރިކާ ޑޮލަރުގައެވެ.
ސަރުކާރުގެ ދަރަނި ބެލެހެއްޓުމުގެ ސިޔާސަތާ ގުޅޭގޮތުން ފިނޭންސް މިނިސްޓްރީން ވިދާޅުވީ، ދަރަނި އަދާކުރަންޖެހޭ ތާރީޚުތަކަށް ދުރާލައި ވަރަށް ފުރިހަމައަށް ރޭވުންތެރިކަމާއެކު ސަރުކާރުން ތައްޔާރުވަމުން އަންނަ ކަމަށެވެ. އަދި މުސްތަޤްބަލުގައި ދަރަނި އަދާކުރުމަށްޓަކައި ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ގަވާއިދުން ފައިސާ ޖަމާކުރުމުގެ މަސައްކަތްވެސް ހުއްޓުމެއްނެތި ކުރިއަށްދާ ކަމަށް އެ މިނިސްޓްރީން ހާމަކުރެއެވެ.
މީގެ އިތުރުން، ރާއްޖޭގެ މާލީ ހާލަތު އިތުރަށް ހަރުދަނާކޮށް، ބޭރު ފައިސާގެ ރިޒާވް އިތުރުކުރުމަށްޓަކައި ބައިނަލްއަޤްވާމީ މާލީ އިދާރާތަކާއި ތަރައްޤީގެ ބައިވެރިންނާއެކު އުފެއްދުންތެރި އަދި މުހިންމު މަޝްވަރާތަކެއް ސަރުކާރުން ކުރަމުންދާ ކަމަށްވެސް ފިނޭންސް މިނިސްޓްރީން ވަނީ ބުނެފައެވެ.
