އޭވިއޭޝަން އިންސްޓިޓިއުޓާއެކު ދާއިރާއަށް ބޭނުންވާ ފަންނީ މީހުން ބިނާކުރުން ހަލުވިވާނެ ކަމަށް އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ވިދާޅުވެއްޖެއެވެ.

ރާއްޖޭގެ ވައިގެ ދަތުރުފަތުރުގެ ދާއިރާއަށް ބޭނުންވާ ގާބިލު އަދި ފަންނީ މަސައްކަތްތެރިން ބިނާކުރުމަށްޓަކައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އުފެއްދި "އޭވިއޭޝަން އިންސްޓިޓިއުޓް އޮފް މޯލްޑިވްސް" (އެއިމް) ރަސްމީކޮށް މިއަދު މިވަނީ އިފްތިތާޙުކޮށްފައެވެ.

ހުޅުލޭ އައިލެންޑް ހޮޓެލް (އެޗްއައިއެޗް) ގައި ބޭއްވުނު މި ޚާއްޞަ ރަސްމިއްޔާތުގައި، އެ އިންސްޓިޓިއުޓްގެ ފުރަތަމަ ބެޗުގެ ދަރިވަރުން ވަނީ ދަސްވެނިވެފައެވެ. މި ހަފްލާގައި ވާހަކަދައްކަވަމުން ޝަރީފް ވިދާޅުވީ، މި އިންސްޓިޓިއުޓްގެ ސަބަބުން މި ދާއިރާއަށް ބޭނުންވާ އިންސާނީ ވަސީލަތްތައް ތަރައްގީކުރުމުގެ މަސައްކަތަށް ބޮޑު ދިރުމެއް ލިބި، އެ މަސައްކަތް އިތުރަށް ހަލުވިވެގެންދާނެ ކަމަށެވެ.

ޝަރީފްގެ ވާހަކަފުޅުގައި، ކުންފުނީގެ ކުރިއެރުމުގެ އަސްލަކީ މަސައްކަތަށް ކުޅަދާނަ، ތަމްރީނު ލިބިފައިވާ މުވައްޒަފުންކަން ފާހަގަކުރެއްވިއެވެ. އަދި މި އިންސްޓިޓިއުޓް އުފެއްދުމުގެ އެންމެ ބޮޑު ބޭނުމަކީ އެމްއޭސީއެލްގެ މުވައްޒަފުންނަށް ހަމަޖެހިފައިވާ އޮނިގަނޑެއްގެ ތެރެއިން ތައުލީމާއި ތަމްރީނު ފޯރުކޮށްދީ، ވަޒީފާގެ ކުރިއެރުން ހޯދައިދިނުން ކަމަށް އޭނާ ވިދާޅުވިއެވެ.

މިއަދުގެ ރަސްމިއްޔާތުގައި ސެޓްފިކެޓް ލެވެލް 3 ގެ "އެއަޕޯޓް ސެކިއުރިޓީ މެނޭޖްމަންޓް" ކޯސް ފުރިހަމަކުރި 29 ދަރިވަރަކަށް ވަނީ ސަނަދު ހަވާލުކޮށްފައެވެ. މިއީ މި އިންސްޓިޓިއުޓުން ދަސްވެނިވި ފުރަތަމަ ގުރޫޕެވެ.

ޝަރީފް ވަނީ ދަސްވެނިވި ހުރިހާ ދަރިވަރުންނަށް މަރުހަބާ ވިދާޅުވެފައެވެ. އަދި އެމްއޭސީއެލްގައި މަސައްކަތްކުރާ ހުރިހާ މުވައްޒަފުންވެސް، މި އިންސްޓިޓިއުޓް މެދުވެރިކޮށް ހުޅުވިފައިވާ ތައުލީމީ ފުރުސަތުތަކުގެ ބޭނުން އެންމެ ފުރިހަމަ ގޮތުގައި ހިފުމަށް އޭނާ އިލްތިމާސް ކުރެއްވިއެވެ.

މި އިންސްޓިޓިއުޓަކީ ރާއްޖޭގެ އޭވިއޭޝަން ދާއިރާ ބައިނަލްއަގުވާމީ ފެންވަރަށް ތަރައްގީކުރުމަށް ސަރުކާރުންނާއި އެމްއޭސީއެލް އިން ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ.