މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ އެންމެ ފަހުގެ މަޢުލޫމާތު ހިއްސާކޮށް، ވިޔަފާރިވެރިންގެ ޚިޔާލު ހޯދުމަށް މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އިން މިއަދު ޚާއްޞަ މަޝްވަރާ ބައްދަލުވުމެއް ބާއްވައިފިއެވެ.

މީރުމާގައި ބޭއްވި މި ބައްދަލުވުމުގައި އެމް.ޕީ.އެލްގެ ސީ.އީ.އޯ ކެޕްޓަން ހުސައިން ޝަފީޤާއި ކުންފުނީގެ އިސް މެނޭޖްމަންޓުން ވަނީ ރާއްޖޭގެ ބޮޑެތި ވިޔަފާރިވެރިންނާ ބައްދަލުކުރައްވާފައެވެ. މި ބައްދަލުވުމުގެ މައިގަނޑު އަމާޒަކީ، ބަނދަރު ބަދަލުވުމުގެ މަރުޙަލާގައި ވިޔަފާރިވެރިންނަށް އެންމެ ފައިދާހުރި ގޮތަކަށް ކަންކަން ބައްޓަންކުރުމެވެ.

މި ބައްދަލުވުމުގައި ވިޔަފާރިވެރިންގެ ފަރާތުން ވަނީ، ތިލަފުށީގައި ޤާއިމުކުރާ ބަނދަރަކީ މިހާރަށްވުރެ ހަރުދަނާ އަދި އަވަސް ޚިދުމަތްތަކެއް ލިބޭނެ 'އެފިޝިއަންޓް' ނިޒާމަކަށް ހެދުމަށް މުހިންމު ހުށަހެޅުންތަކެއް ހުށަހަޅާފައެވެ. މާލޭ ބަނދަރަށްވުރެ 12 ގުނަ ބޮޑު ސަރަހައްދެއްގައި ތަރައްޤީކުރާ މި ބަނދަރު ވެގެންދާނީ، މާލޭގެ ތޮއްޖެހުމަށް ނިމުމެއް ގެނުވައި، މުދާ ބޭލުމާއި ދޫކުރުމުގެ މަސައްކަތް ޒަމާނީ ވަސީލަތްތަކާއެކު 24 ގަޑިއިރު ކުރެވޭނެ ތަނަކަށެވެ.

އެމް.ޕީ.އެލް އިން ފާހަގަކުރި ގޮތުގައި، މި މަޝްރޫޢަކީ ގިނަ ބައެއްގެ މަޞްލަޙަތު ހިމެނޭ ކަމަކަށްވާތީ، މީގެ ކުރިންވެސް ވަނީ ސަރުކާރުގެ ކަމާބެހޭ ވުޒާރާތަކާއި، މީޑިއާ އަދި މަޖޫރީންނާ މަޝްވަރާކޮށްފައެވެ. އަދި ކުރިއަށް އޮތް ތަނުގައިވެސް އިތުރު ހިއްސާދާރުންނާ ބައްދަލުކުރުމަށް ވަނީ ހަމަޖެހިފައެވެ.

ރައީސް މުޢިއްޒުގެ އިޤްތިޞާދީ ވަޢުދުފުޅުތަކުގެ ތެރޭގައި ހިމެނޭ މި މަޝްރޫޢަކީ "ސްޓޭޓް-އޮފް-ދި-އާޓް" މަލްޓި-ޕާޕަސް ބަނދަރެއް ތަރައްޤީކުރުމުގެ މަޝްރޫޢެކެވެ. ރައީސް މުޢިއްޒު ވަނީ އަންނަ އަހަރުގެ ނޮވެންބަރު 11 ގައި މި ބަނދަރުގެ ޚިދުމަތް ރަސްމީކޮށް ފަށްޓަވާނެ ކަމަށް އިޢުލާނު ކުރައްވާފައެވެ.

މި ބަނދަރު ހުޅުވުމާއެކު، މާލޭގެ ބަނދަރަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ލިބި، ރާއްޖޭގެ ވިޔަފާރި އާއި އިޤްތިޞާދަށް އައު ދިރުމެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.