ރާއްޖޭގެ ކަނޑުގެ ދިރުންތަކާއި ވަސީލަތްތަކާ ގުޅޭގޮތުން ކުރެވޭ ސައިންޓިފިކް ދިރާސާތައް ހިއްސާކުރުމަށް ބާއްވާ "މޯލްޑިވްސް މެރިން ސައިންސް ސިމްޕޯސިއަމް" ގެ 6 ވަނަ ބައްދަލުވުން އަންނަ އަންގާރަ ދުވަހު ބޭއްވުމަށް މޯލްޑިވްސް މެރިން ރިސާރޗް އިންސްޓިޓިއުޓް (އެމް.އެމް.އާރް.އައި) އިން އިއުލާނުކޮށްފިއެވެ.

މޯލްޑިވްސް ނޭޝަނަލް ޔުނިވާސިޓީ (އެމް.އެން.ޔޫ) އާ ގުޅިގެން ބާއްވާ މި ސިމްޕޯސިއަމް އޮންނާނީ މިމަހު 4 އިން 5 އަށް އެ ޔުނިވަރސިޓީގެ ސެންޓްރަލް އޯޑިޓޯރިއަމްގައެވެ. މި ބައްދަލުވުން ރަސްމީކޮށް ހުޅުވައިދެއްވާނީ ފިޝަރީޒް މިނިސްޓަރު އަޙުމަދު ޝިޔާމްއެވެ.

ސިމްޕޯސިއަމްގައި ޖުމްލަ 47 ދިރާސާ (32 އޯރަލް ޕްރެޒެންޓޭޝަން އަދި 15 ޕޯސްޓަރ) ކުރިޔަށް ގެންދާނެއެވެ. އެގޮތުން ފަރުތަކުގެ ދިރުން، މޫސުމީ ބަދަލުތައް، މަސްވެރިކަން، ވެލާކަހަނބުގެ އިކޮލޮޖީ، މެރިން މެގަފައުނާ (މަޑިއާއި މިޔަރު ފަދަ ތަކެތި) އަދި ކަނޑުގެ ދޫނިސޫފާސޫއްޕާއި ބެހޭ ގޮތުން ދިރާސާކުރެވޭނެއެވެ.

މި ސިމްޕޯސިއަމް އަކީ 2016 ވަނަ އަހަރުން ފެށިގެން ކޮންމެ ދެ އަހަރުން އެއް އަހަރު ބާއްވަމުން އަންނަ، ރާއްޖޭގައި މި ދާއިރާއިން ބޭއްވޭ އެންމެ ބޮޑު އަދި ހަމައެކަނި ސައިންޓިފިކް ބައްދަލުވުމެވެ.

އެމްއެމްއާރްއައި އިން މައުލޫމާތު ދޭ ގޮތުގައި، މި ސިލްސިލާ ބައްދަލުވުންތަކުގެ މައިގަނޑު އަމާޒަކީ ރާއްޖޭގެ ކަނޑުގެ މާހައުލާ ގުޅޭގޮތުން ޔުނިވަރސިޓީތަކާއި އެކި ޖަމިއްޔާތަކުން ކުރާ ދިރާސާތަކުގެ ނަތީޖާ އެއް ފުރާޅެއްގެ ދަށުން ހިއްސާކުރުމެވެ. މީގެ އިތުރުން، މި ދާއިރާގައި މަސައްކަތްކުރާ ފަރާތްތަކުގެ މެދުގައި ގުޅުން ބަދަހިކޮށް، މަޢުލޫމާތު ބަދަލުކުރުމަށް ލިބޭ ރަނގަޅު ފުރުޞަތަކަށް މި ބައްދަލުވުން ވެގެންދާނެއެވެ.