ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް ވަގުތުތަކުގައި މޫސުން އިތުރަށް ގޯސްވާނެތީ، ކަނޑުދަތުރުކުރާ ފަރާތްތަކުން ހާއްސަ ސަމާލުކަމެއް ދިނުމަށް މޫސުމާ ބެހޭ ގައުމީ އިދާރާ (މެޓް) އާއި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މިއަދު އިލްތިމާސްކޮށްފިއެވެ.
މެޓް އޮފީހުން މައުލޫމާތު ދޭ ގޮތުގައި، ރާއްޖޭގެ ބޮޑު ސަރަހައްދަކަށް މިއަދު ހެނދުނު 11:45 އިން ހަވީރު 18:00 އާ ހަމައަށް ވަނީ ހުދު ސަމާލު ނެރެފައެވެ. މި މުއްދަތުގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާކުރެވެއެވެ. އަދި މި ވިއްސާރައިގައި ރާއްޖޭގެ ކަނޑުތައް އާދައިގެ ވަރަކަށްވުރެ ގަދަވެ، ރާޅުގެ އުސްމިން 4 ފޫޓާއި 7 ފޫޓާ ދެމެދުގެ އުސްމިނެއްގައި ހުންނާނެ ކަމަށް ލަފާކޮށްފައިވެއެވެ.
މޫސުން ގޯސްވުމާ ގުޅިގެން އެމްއެންޑީއެފް ކޯސްޓްގާޑުން ވަނީ ދަތުރުވެރިންގެ ސަލާމަތާއި ރައްކާތެރިކަމަށްޓަކައި ގިނަ ކަންތައްތަކަކަށް އިލްތިމާސްކޮށްފައެވެ. އެގޮތުން، އެއްވެސް ދަތުރެއް ފެށުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށާއި، ދަތުރަށް ފުރުމުގެ ކުރިން އަންގަންޖެހޭ ފަރާތްތަކަށް އެންގުމަށް ވަނީ ބާރުއަޅާފައެވެ.
ކޯސްޓްގާޑުން އިތުރަށް އަންގާފައިވަނީ:
- އުޅަނދުގައި ލައިފްޖެކެޓާއި، މުވާސަލާތީ ނިޒާމާއި، ދިޔަހިއްކާ ޕަންޕު ފަދަ ތަކެތި ހުރީ ރަނގަޅަށްތޯ ޗެކްކުރުން.
- މުދާ އުފުލާ އުޅަނދުތަކުން، ކަނޑައެޅިފައިވާ މިންވަރަށްވުރެ އިތުރަށް ބަރު ނުކުރުމާއި މުދާ ރަނގަޅަށް ލައިސަންލާފައި ބެހެއްޓުން.
- ދަތުރުކުރާ އެންމެހާ ފަރާތްތަކުން ލައިފްޖެކެޓް އެޅުމަށް ސަމާލުކަން ދިނުން.
- ޑައިވިންގ އާއި ވޯޓަރ ސްޕޯޓްސްގެ ހަރަކާތްތައް ހިންގާ ފަރާތްތަކުން މޫސުމަށް ހާއްސަ ސަމާލުކަމެއް ދިނުން.
މީގެއިތުރުން، މެޓް އޮފީހުން ރީނދު ނުވަތަ އޮރެންޖު ސަމާލު ނެރެފައިވާ ސަރަހައްދުތަކުގައި ދަތުރު ނުކުރުމަށް ވެސް ކޯސްޓްގާޑުން ވަނީ އިރުޝާދު ދީފައެވެ. ރާއްޖޭގެ އެކި ހިސާބުތަކަށް ވިއްސާރަކޮށް ގުގުރުން އެކަށީގެންވާ ކަމަށް ލަފާކުރެވޭއިރު، ވައި ޖެހޭނީ ހުޅަނގުދެކުނާއި ހުޅަނގުން ކަމަށް މޫސުމާ ބެހޭ އިދާރާއިން ބުނެއެވެ.
މި ދުވަސްވަރަކީ ރާއްޖެއަށް މޫސުން ގޯސް ދުވަސްވަރަކަށް ވާތީ، ހުރިހާ ފަރާތްތަކުން ވެސް ރައްކާތެރިކަމުގެ ފިޔަވަޅުތައް އެޅުމަށް ސަރުކާރުގެ ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.
