މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ހައްލެއް ހޯދުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކުރަމުންދާ މަސައްކަތްތަކުގެ ދަށުން، ތިލަފުށީ ބަނދަރުުގައި "އެމްވީ ސެލެސްޓިއާ" ނަމަކަށް ކިޔާ ބޯޓަށް މުދާ ބަރުކުރުމުގެ މަސައްކަތް ވަނީ ކުރިޔަށް ގެންގޮސްފައެވެ.
އެމްޕީއެލުން ހާމަކުރިގޮތުގައި، މިދިޔަ އާދީއްތަ ދުވަހު ކުރިއަށްދިޔަ މި އޮޕަރޭޝަނުގައި އެ ބޯޓަށް ޖުމްލަ 372 ޓީއީޔޫގެ ކޮންޓެއިނަރު ބަރުކޮށްފައިވެއެވެ. މި ބޮޑު އޮޕަރޭޝަން އެމްޕީއެލްގެ މުވައްޒަފުން ނިންމާލާފައިވަނީ 24 ގަޑިއިރަށްވުރެ ކުރު މުއްދަތެއްގެ ތެރޭގައެވެ.
އެމްޕީއެލުން ބުނީ މިއީ ބަނދަރުގެ މަސައްކަތްތައް އަވަސްކުރުމަށް އެ ކުންފުނިން ކުރަމުންދާ މަސައްކަތަށް ލިބުނު ބޮޑު ކުރިއެރުމެއް ކަމަށެވެ.
As part of our continued efforts to ease port congestion, container loading operations for the general cargo vessel MV Celestia were successfully carried out at the Thilafushi Berth yesterday.
A total of 372 TEUs were loaded onto the vessel in under 24 hours. Since the trial… pic.twitter.com/eVD3ydwAj2
— Maldives Ports Limited (@Portmv) July 13, 2026
ތިލަފުށީ ބަނދަރުގައި ބޯޓުފަހަރު ކައިރިކޮށްގެން މުދާ ބަރުކުރުމާއި ބޭލުމުގެ ޓްރަޔަލް އޮޕަރޭޝަންތައް މިއަހަރުގެ މެއި މަހު ފެށި ފަހުން، "އެމްވީ ސެލެސްޓިއާ" އަކީ އެތަނަށް ކާމިޔާބުކަމާއެކު ކައިރިކުރި ހަތަރުވަނަ ބޯޓެވެ. މި އިންތިޒާމުގެ ސަބަބުން މާލޭ ވިޔަފާރި ބަނދަރަށް ބާރުބޮޑުވުން ކުޑަވެ، މުދާ އުފުލާ އުޅަނދުފަހަރަށް ދޭ ޚިދުމަތްތައް އިތުރަށް ހަލުވިވެގެންދާނެއެވެ.
މި ސަރުކާރުން އިގްތިސާދީ ދާއިރާ ހަރުދަނާކޮށް، ރާއްޖޭގެ ބަނދަރުތަކުގެ ހިންގުން ހަރުދަނާކުރުމަށް ގެންގުޅުއްވާ ސިޔާސަތުގެ ދަށުން، އެމްޕީއެލުން އަންނަނީ ތިލަފުށީގެ ބޭނުން އެންމެ ފުރިހަމަ ގޮތުގައި ހިފުމަށް ގިނަ މަސައްކަތްތަކެއް ކުރަމުންނެވެ. މީގެ އިތުރުން، ބަނދަރުގެ ހިދުމަތްތައް ޒަމާނީ ފެންވަރަށް ތަރައްގީކުރުމަކީ ސަރުކާރުގެ މުހިންމު އަމާޒެކެވެ.
