ސަރުކާރުގެ ސްކޫލްތައް އޭސީ ކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އިރުޝާދުގެ ދަށުން ފަށާފައިވާ 'ކޫލް ސްކޫލް' މަޝްރޫއުގެ 61 އިންސައްތަ މަސައްކަތް މިހާރު ނިމިފައިވާ ކަމަށް ތައުލީމާއި މަތީ ތައުލީމާއި ހުނަރުތައް ތަރައްގީކުރުމާ ބެހޭ ވަޒީރު ޑރ. އިސްމާއީލް ޝަފީއު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގައި ވާހަކަދައްކަވަމުން ވަޒީރު ވިދާޅުވީ، ރާއްޖޭގެ 217 ސްކޫލެއްގައި ކުރިއަށްގެންދާ މި ބޮޑު މަޝްރޫއުގެ ދަށުން، ހުރިހާ ސްކޫލަކަށް މިހާރު އޭސީތައް ފޮނުވައި ނިމިފައިވާ ކަމަށެވެ. އަދި މިހާރު ކުރިއަށްދަނީ ބާކީ ހުރި ސްކޫލްތަކުގެ ކަރަންޓު ވިއުގަ ވަރުގަދަކުރުމުގެ މަސައްކަތް ކަމަށް އެމަނިކުފާނު ފާހަގަކުރެއްވިއެވެ.
އަޅުގަނޑުމެންގެ އަމާޒަކީ އިރާދަކުރެއްވިއްޔާ ދެވަނަ ޓާމުގެ ކިޔެވުން ފެށެންވާއިރަށް ގިނަ ސްކޫލްތަކެއްގެ މަސައްކަތް އެއްކޮށް ނިންމާލުން،" ވަޒީރު ވިދާޅުވިއެވެ.
މި މަޝްރޫއަކީ ދަރިވަރުންނާއި މުދައްރިސުން ކްލާސްރޫމްތަކުގައި ތަހައްމަލު ކުރަމުންދާ ގަދަ ހޫނަށް ދާއިމީ ހައްލެއް ހޯދައިދިނުމަށްޓަކައި ސަރުކާރުން ފެށި މުހިންމު މަސައްކަތެކެވެ. މީގެ ކުރިން ސްކޫލްތަކުގައި އޭސީ ހަރުކުރުމަކީ މަނާކަމެއްގެ ގޮތުގައި އޮތް ނަމަވެސް، މި ސަރުކާރުން ވަނީ އެ ސިޔާސަތު ބަދަލުކޮށް، ދަރިވަރުންނަށް އުނގެނުމަށް ފަހި މާހައުލެއް ގާއިމުކޮށްދިނުމަށް އިސްކަންދީފައެވެ.
މަސައްކަތް ނިންމުމުގައި ހުރި ގޮންޖެހުންތަކާ ގުޅޭގޮތުން ވާހަކަދައްކަވަމުން ޑރ. ޝަފީއު ވިދާޅުވީ، ބައެއް ސްކޫލްތަކަކީ 35 ނުވަތަ 45 އަހަރުވެފައިވާ ބައެއް އިމާރާތްތައް ކަމަށްވުމުން، އެތަންތަނުގައި ހުރި ސިންގަލް ފޭސް ކަރަންޓު ވިއުގަ އަޕްގްރޭޑް ކުރަން ޖެހުމަކީ ވަގުތު ނަގާ ކަމެއް ކަމަށެވެ. ނަމަވެސް އެ ގޮންޖެހުންތަކާއެކުވެސް މަސައްކަތް ބާރުދުވެލީގައި ކުރިއަށްދާކަން ވަޒީރު ފާހަގަކުރެއްވިއެވެ.
މި މަޝްރޫއު ނިމުމުން، ރާއްޖޭގެ ހުރިހާ ސަރުކާރު ސްކޫލެއްގެ ކްލާސްރޫމްތަކަކީ ދަރިވަރުންނަށް ހިތްފަސޭހަކަމާއެކު ކިޔެވޭނެ ފަދަ ފިނި މާހައުލަކަށް ވެގެންދާނެއެވެ.
