މާލޭގެ ބޮޑުތަކުރުފާނު މަގު ތަރައްގީކުރުމުގެ ބިޔަ މަޝްރޫއުގެ ދަށުން، އެ މަގުގައި ތާރު އެޅުމުގެ އަމަލީ މަސައްކަތް ފެށުމަށްޓަކައި ކާނިވާ ސަރަހައްދުން ފެށިގެން ހެންވޭރު ފެރީ ޓާމިނަލާ ހަމައަށް ޕާކުކޮށްފައިވާ އުޅަނދުތައް ނެގުމަށް ފުލުހުން މިއަދު އަންގައިފިއެވެ.
މި މަޝްރޫއު ކުރިއަށްގެންދާ އެމްޓީސީސީން ހާމަކުރި ގޮތުގައި، ބޮޑުތަކުރުފާނު މަގުގައި ތާރު އެޅުމުގެ މަސައްކަތް ފެށުމަށް ހަމަޖެހިފައިވަނީ އަންނަ ބުދަ ދުވަހުއެވެ. މި މަސައްކަތަށް ތައްޔާރުވުމުގެ ގޮތުން މިރޭ 11:50 އިން ފެށިގެން ކާނިވާ ސަރަހައްދުން ތާރު އެޅުމަށް ކަނޑައަޅާފައިވާ ސަރަހައްދު ބަންދުކުރާނެ ކަމަށް ފުލުހުން ވިދާޅުވެއެވެ.
ފުލުހުން ވަނީ އެ ސަރަހައްދުގައި އުޅަނދުތައް ޕާކު ނުކުރުމަށާއި، މިހާރު ޕާކުކޮށްފައި ހުރި އުޅަނދުތައް ވީ އެންމެ އަވަހަކަށް ނެގުމަށް އިލްތިމާސްކޮށްފައެވެ. އަދި އެންގުމާ އެއްގޮތަށް އަމަލުނުކުރާ އުޅަނދުތައް ފުލުހުން ނަގާނެ ކަމުގެ އިންޒާރުވެސް ވަނީ ދީފައެވެ. މި މަސައްކަތުގެ ސަބަބުން އާންމުންނަށް ދިމާވެދާނެ ދަތިތަކަށްޓަކައި ފުލުހުން ވަނީ މާފަށް އެދިފައެވެ.
އެމްޓީސީސީން ވިދާޅުވީ ތާރު އެޅުމުގެ މަސައްކަތް ކުރިއަށް ގެންދާނީ ދެ ބަޔަކަށް ބަހާލައިގެން ކަމަށެވެ. އެގޮތުން އެންމެ ފުރަތަމަ ތާރު އަޅާނީ ހެންވޭރު ޓާމިނަލުން ފެށިގެން ފޮރިން މިނިސްޓްރީއާ ހަމައަށެވެ. އެ ސަރަހައްދު ނިމުމުން ބާކީ އޮތް ބައިގެ މަސައްކަތް ފަށާނެއެވެ. މަގުގެ ބައެއް ބަންދުކުރި ނަމަވެސް، ކާނިވާގެ އެތެރޭގައި އޮންނަ ޕާކިން ޒޯނަށް އުޅަނދުތަކަށް ވަދެވޭނެ ކަމަށް އެ ކުންފުނިން ބުނެއެވެ.
މިދިޔަ މާޗު މަހުގެ 23 ގައި ފެށި މި މަޝްރޫއާ ގުޅޭގޮތުން އެމްޓީސީސީގެ މެނޭޖިން ދިރެކްޓަރު އަހުމަދު ސައުދީ ވިދާޅުވީ، އަމާޒަކީ އަންނަ ޖުލައި މަހުގެ 26 ވަނަ ދުވަހުގެ ކުރިން މަސައްކަތް އެއްކޮށް ނިންމައި އާންމުންނަށް މަގު ހުޅުވާލުން ކަމަށެވެ.
މި މަޝްރޫއުގެ ދަށުން މިހާތަނަށް ކުރެވުނު މަސައްކަތްތަކަށް ބަލާއިރު، ނަރުދަމާ އާއި ފެން ހޮޅި އެޅުމުގެ އިތުރުން ކޭބަލް ޖަންކްޝަންތަކުގެ މަސައްކަތް ވަނީ 100 އިންސައްތަ ނިމިފައެވެ. މިހާރު ކުރިއަށްދަނީ އިއްޒުއްދީން ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮތް ހަތަރު ސެގްމެންޓެއްގެ ތަރައްގީގެ މަސައްކަތްތަކެވެ. މި މަޝްރޫއަކީ މާލޭގެ އިރުމަތީ ފަރާތުގެ ތޮއްޖެހުން ކުޑަކޮށް، ދަތުރުފަތުރުގެ ނިޒާމު ހަރުދަނާކުރުމަށް ރައީސް ޑރ. މުހައްމަދު މުއިއްޒުގެ ސަރުކާރުން އިސްކަންދީގެން ކުރިއަށްގެންދާ މުހިންމު މަޝްރޫއެކެވެ.
