މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އެންމެ ބާރުގަދަ އިދާރީ މަގާމު ކަމަށްވާ ޗެއާޕާސަންގެ މަގާމަށް ބޭފުޅަކު ހޮވުމަށް އިއްޔެ ބޭއްވި އިންތިހާބު، ކުރީގެ ރައީސް މުހައްމަދު ނަޝީދު ބޮޑު ތަފާތަކުން ކާމިޔާބު ކުރައްވައިފިއެވެ.

ރާއްޖޭގެ އެކި ކަންކޮޅުތަކާއި ސްރީލަންކާ ހިމެނޭހެން ޖުމްލަ 241 ވޯޓު ފޮށި ބަހައްޓައިގެން ކުރިއަށްދިޔަ މި އިންތިހާބުގައި ރައީސް ނަޝީދާ ވާދަކުރެއްވީ ގަލޮޅު ދެކުނު ދާއިރާގެ މެންބަރު މީކާއިލް ނަސީމެވެ. މިހާތަނަށް ގުނާ ނިމިފައިވާ 130 ފޮށީގެ ވަގުތީ ނަތީޖާ ދައްކާގޮތުން، ރައީސް ނަޝީދު ވަނީ 8,661 ވޯޓު ހޯއްދަވާފައެވެ. މީކާއިލް ނަސީމަށް ލިބިވަޑައިގެންފައިވަނީ 4,158 ވޯޓެވެ. މިއާއެކު 4,503 ވޯޓުގެ ބޮޑު ފަރަގަކުން ރައީސް ނަޝީދު ވަނީ ކުރިހޯއްދަވާފައެވެ.

އިންތިހާބުގެ ނަތީޖާ ސާފުވަމުންދަނިކޮށް، މީކާއިލް ނަސީމް ވަނީ ބަލި ގަބޫލުކުރައްވައި ރައީސް ނަޝީދަށް ގުޅުއްވައި މަރުހަބާ ދަންނަވާފައެވެ. ކާމިޔާބީއަށްފަހު ރައީސް ނަޝީދު ވިދާޅުވީ، ކުރިއަށް އޮތް ތަނުގައި ޕާޓީގެ ހުރިހާ މެންބަރުންނާއެކު އެކަތިގަނޑެއްގެ ގޮތުގައި މަސައްކަތް ކުރައްވާނެ ކަމަށެވެ.

ޖުމްލަ 50,176 މީހުންނަށް ވޯޓުލުމުގެ ހައްގު ލިބިގެންވީ މި އިންތިހާބުގައި، ރައީސް ނަޝީދު ކެމްޕެއިން ކުރެއްވީ "ބޮޑު ބަދަލު" ގެ ނަމުގައެވެ. އެމަނިކުފާނުގެ ފަހަތްޕުޅުގައި ކުރީގެ ޗެއާޕާސަން ފައްޔާޒް އިސްމާއިލާއި، ކުރީގެ ފިނޭންސް މިނިސްޓަރު އިބްރާހިމް އަމީރުގެ އިތުރުން ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ފަދަ އިސް ބޭފުޅުން ތިއްބެވިއެވެ. މީކާއިލް ނަސީމަށް ތާއީދު ކުރެއްވީ ކުރީގެ ރައީސް އިބްރާހިމް މުހައްމަދު ސޯލިހެވެ.

މީގެކުރިންވެސް ޗެއާޕާސަންގެ މަގާމު ފުރުއްވާފައިވާ ރައީސް ނަޝީދު ވަނީ، ކުރިއަށް އޮތް ރިޔާސީ އިންތިހާބުގައި އެމަނިކުފާނު ވާދަނުކުރައްވާނެ ކަމަށް އިއުލާން ކުރައްވާފައެވެ. އޭގެ ބަދަލުގައި އެމަނިކުފާނު ތާއީދު ކުރައްވަން ނިންމަވާފައިވަނީ އެމްޑީޕީގެ ރިޔާސީ ޓިކެޓަށް ވާދަކުރައްވާނެކަން އިއުލާން ކުރައްވާފައިވާ ފައްޔާޒް އިސްމާއިލަށެވެ.