ފިލިޕީންސްގެ މިންޑަނާއޯ ސަރަހައްދަށް އިއްޔެ އައި ނުރައްކާތެރި ބިންހެލުމުގައި އެތައް ބަޔަކު މަރުވެ، ބޮޑެތި ގެއްލުންތަކެއް ލިބުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ގައުމުގެ ރައީސް ފަޑިނަންޑް ރޮމުލްޑޭޒް މާކޮސް ޖޫނިއާ އަށް ތައުޒިޔާގެ މެސެޖެއް ފޮނުއްވައިފިއެވެ.

7.8 މެގްނިޓިއުޑްގެ ބާރުމިނުގައި އައި މި ބިންހެލުމުގައި މިހާތަނަށް 41 މީހުން މަރުވެފައިވާކަން ވަނީ ކަށަވަރުވެފައެވެ. އަދި 487 އަށްވުރެ ގިނަ މީހުންނަށް އެކި ވަރުގެ އަނިޔާތައް ލިބިފައިވާއިރު، ފުރަތަމަ ބިންހެލުމަށްފަހުވެސް އިތުރު ދެ ބާރުގަދަ ލޮޅުން އެ ގައުމަށް އިހުސާސް ކުރެވިފައިވާ ކަމަށް ރިޕޯޓުތައް ބުނެއެވެ.

މި ގުދުރަތީ ކާރިސާގައި މިންޑަނާއޯގެ އައްސޭރިފަށުގެ ގިނަ އިމާރާތްތަކެއް ބިމާ ހަމަވެފައިވާއިރު، ބިންގަނޑު ކަނޑައިގެން ދިއުމާއި މަގުތަކަށް ލިބުނު ގެއްލުންތަކުގެ ސަބަބުން ބައެއް އަވަށްތައް ވަނީ އެކަހެރިވެފައެވެ. މީގެ އިތުރުން، އެ ސަރަހައްދުގެ ބޮޑު ބަޔަކުން ކަރަންޓާއި މުވާސަލާތީ ހިދުމަތްތައް ވަނީ މެދުކެނޑިފައެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މި ހާދިސާގެ ޚަބަރު އަޑުއެއްސެވީ ނުހަނު ފުން ހިތާމައާއެކު ކަމަށް ވިދާޅުވިއެވެ. އަދި ދިވެހި ސަރުކާރާއި ރައްޔިތުންގެ ނަމުގައި، ފިލިޕީންސްގެ ސަރުކާރަށާއި ރައްޔިތުންނަށް، ހާއްސަކޮށް މި ހާދިސާގައި ފުރާނަ ގެއްލުނު މީހުންގެ އާއިލާތަކަށް ނުހަނު އިހުލާސްތެރިކަމާއެކު ތައުޒިޔާ އާއި ހަމްދަރުދީ ރައީސް ފޮނުއްވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، މިހާރު ކުރިއަށްދާ މީހުން ސަލާމަތްކުރުމުގެ އޮޕަރޭޝަންތަކަށް ކާމިޔާބީއަށް އެދިވަޑައިގަންނަވަމުންނެވެ.