މޯލްޑިވްސް ނޭޝަނަލް އެއަރލައިން، މޯލްޑިވިއަން އިން އިންޑިއާއަށް ދަތުރުކުރާ ހުރިހާ ފަރާތްތަކުން ދަތުރުގެ ކުރިން "ސެލްފް ޑިކްލަރޭޝަން ފޯމް" (އެސްޑީއެފް) ފުރިހަމަކުރުމަށް އިލްތިމާސްކޮށްފިއެވެ.
މޯލްޑިވިއަން އިން ނެރުނު ޓްރެވަލް އެޑްވައިޒަރީއެއްގައި ބުނެފައިވަނީ، މިއީ އިންޑިއާގެ ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން ނެރެފައިވާ އުސޫލަކާ ގުޅިގެން ނިންމާފައިވާ ނިންމުމެއް ކަމަށެވެ. މި އުސޫލަށް އަމަލުކުރަން ފަށާފައިވަނީ ދުނިޔޭގެ ސިއްހަތު ޖަމިއްޔާ (ޑަބްލިޔު.އެޗް.އޯ) އިން އެބޯލާ ބަލިމަޑުކަމަކީ ބައިނަލްއަގުވާމީ ފެންވަރުގައި ސަމާލުކަންދޭންޖެހޭ ސިއްހީ ކުއްލި ނުރައްކަލުގެ ހާލަތެއްގެ ގޮތުގައި ކަނޑައެޅުމާ ގުޅިގެން، ރައްކާތެރިކަމުގެ ފިޔަވަޅެއްގެ ގޮތުންނެވެ.
މި އެޑްވައިޒަރީގައިވާ ގޮތުން، އިންޑިއާއަށް ދަތުރުކުރާ ހުރިހާ ފަސިންޖަރުންވެސް އެ ގައުމަށް ފުރުމުގެ ކުރިން މި ފޯމު ފުރިހަމަކުރަން ޖެހޭނެއެވެ. ފޯމު ފުރިހަމަކުރުމުގެ އިންތިޒާމު ފަސޭހަކޮށްދިނުމުގެ ގޮތުން މޯލްޑިވިއަން އިން ވަނީ ކިއުއާރު ކޯޑެއް ވެސް އާންމުކޮށްފައެވެ. ދަތުރުވެރިންނަށް މި ކޯޑު ސްކޭން ކޮށްލުމުން ފޯމު ފުރިހަމަކުރުމުގެ މަރުހަލާ ކުރިއަށް ގެންދެވޭނެއެވެ.
އިންޑިއާއަކީ ދިވެހިން ބޭސްފަރުވާއަށާއި، ވިޔަފާރިއަށާއި އަދި ޗުއްޓީ ހޭދަކުރުމަށް އެންމެ ގިނައިން ޒިޔާރަތްކުރާ އެއް ގައުމަށް ވުމާއެކު، ދަތުރުގެ ކަންކަން އެއްވެސް ދަތިކަމެއް ނެތި ކުރިއަށް ގެންދިއުމަށްޓަކައި މި ފޯމު ފުރިހަމަކުރުމަށް މޯލްޑިވިއަން އިން ވަނީ ހާއްސަ ސަމާލުކަމެއް ދިނުމަށް އެދިފައެވެ.
ދުނިޔޭގެ ސިއްހަތު ޖަމިއްޔާއިން ބަލިމަޑުކަމާ ގުޅިގެން ނެރޭ އިންޒާރުތަކާ ގުޅިގެން، ގައުމުތަކުން މިފަދަ ފިޔަވަޅުތައް އަޅަމުންދަނީ ބަލި ފެތުރުން ކޮންޓްރޯލްކޮށް، އާންމު ސިއްހަތު ރައްކާތެރިކުރުމުގެ މަގްސަދުގައެވެ.
