ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހިންގާ މަޝްރޫޢުތަކަށް ކުރިމަތިލާއިރު، މާލޭގައި ރަށްވެހިވެފައިވާ މުއްދަތަށް ބެލުމެއްނެތި އެޕްލައިކުރެވޭ ގޮތަށް އުސޫލުތަކަށް ބަދަލު ގެނެސްފިއެވެ.
މި ބަދަލާއެކު، މާލޭގައި ރަށްވެހިވިތާ އެއް އަހަރަށް ވުރެ ކުރު މުއްދަތެއް ވެފައިވާ ފަރާތްތަކަށްވެސް "ބޯހިޔާވަހިކަން އެންމެންނަށް" ޕޯޓަލް މެދުވެރިކޮށް ފޯމު ހުށަހެޅުމުގެ ފުރުޞަތު މިހާރު ވަނީ ހުޅުވާލާފައެވެ. ކުރިން އޮތް އުސޫލުގެ ދަށުން، މާލޭގެ ދަފްތަރުގައި ނުވަތަ ރަށްވެހިންގެ ގޮތުގައި ވަކި މުއްދަތެއް ފުރިހަމަ ނުވާ ފަރާތްތަކަށް ފޯމު ހުށަހެޅުމުގައި ދަތިތަކެއް ހުއްޓެވެ.
ސަރުކާރުން ހާމަކުރި ގޮތުގައި މި ބަދަލު ގެނައީ ބޯހިޔާވަހިކަމުގެ ދަތިކަން ކުރިމަތިވެފައިވާ ހުރިހާ ފަރާތްތަކަށް ހަމަހަމަ ފުރުޞަތެއް ހޯދައިދިނުމުގެ މަޤްޞަދުގައެވެ. މީގެ އިތުރުން، އެކި ސަބަބުތަކަށްޓަކައި މާލެއަށް ދިރިއުޅުން ބަދަލުކޮށް، ދާދިފަހުން ރަށްވެހިވެފައިވާ ގިނަ އާއިލާތަކަކަށް މި ނިންމުމުގެ ސަބަބުން ބޮޑު ތަސައްލީއެއް ލިބިގެންދާނެއެވެ.
ބޯހިޔާވަހިކަމުގެ މަޝްރޫޢުތަކަށް ފޯމު ހުށަހަޅާ ފަރާތްތަކުގެ މަޢުލޫމާތުތައް ސައްޙަކުރުމުގެ މަސައްކަތް މިހާރު ކުރިއަށްދާއިރު، މި ބަދަލާއެކު އަލަށް އެޕްލައިކުރާ ފަރާތްތަކުގެ ފޯމުތައްވެސް ދެން ބަލައިގަންނާނެއެވެ. ސަރުކާރުގެ އަމާޒަކީ މި ދައުރުގެ ތެރޭގައި ބޯހިޔާވަހިކަމަށް ބޭނުންވެފައިވާ ހުރިހާ ރައްޔިތުންނަށް ދާއިމީ ހައްލެއް ހޯދައިދިނުމެވެ.
ސަރުކާރުގެ ބޯހިޔާވަހިކަމުގެ މަޝްރޫޢުތަކަށް ފޯމު ހުށަހެޅުމުގެ ފުރުޞަތު މިހާރު ވަނީ މިމަހުގެ ނިޔަލަށް އިތުރުކޮށްފައެވެ.. މި މަޝްރޫޢަށް ކުރިމަތިލާ ހުރިހާ ފަރާތްތަކުންވެސް "ހިޔާވަހި ޕޯޓަލް" މެދުވެރިކޮށް ސުންގަޑި ހަމަވުމުގެ ކުރިން ފޯމު ހުށަހަޅަންޖެހޭއިރު، މިއީ ބޯހިޔާވަހިކަމުގެ ދަތިކަން ކުރިމަތިވެފައިވާ ހުރިހާ ރައްޔިތުންނަށް ހަމަހަމަ ފުރުޞަތެއް ހޯދައިދިނުމަށް ސަރުކާރުން ނިންމި މުހިންމު ނިންމުމެކެވެ.
