ނޫސްވެރިކަމުގެ އަސާސީ ހަމަތަކާއި އުސޫލުތަކަށް ބޯލަނބައި، މައުލޫމާތު ފެތުރުމުގައި މިހާރަށްވުރެ ޒިންމާދާރުވުމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް އިލްތިމާސްކުރައްވައިފިއެވެ.
އެކްސް މެދުވެރިކޮށް ދެއްވި މެސެޖެއްގައި އެމަނިކުފާނު ވަނީ ނޫސްވެރިކަމުގެ މަބްދައުތައް ނެގެހެއްޓުމުގައި ދެމިތިބުމުގެ މުހިންމުކަން ފާހަގަކުރައްވާފައެވެ.
ނޫސްވެރިކަމުގެ އަޚުލާޤީ މިންގަނޑުތަކަށް ބޯލަނބައިގެން މައުލޫމާތުގެ ޞައްޙަކަން ކަށަވަރުކުރުމަށާއި، ދެފުށްފެންނަ އަދި ޖަވާބުދާރީކުރުވޭ ނިޒާމެއްގެ ތެރެއިން ޑިމޮކްރަސީގެ އަސާސްތައް ވަރުގަދަކުރުމަށް ނައިބު ރައީސް ވަނީ ވިދާޅުވެފައެވެ.އަދި ނޫސްވެރިކަމުގައި އަޚުލާޤީ މިންގަނޑުތައް އެއްފަރާތްކޮށްފިނަމަ، ދޮގު މައުލޫމާތު އާންމުވެ، ގެއްލުންދެނިވި ކަންކަން އިތުރުވެ، ސައްހަ މައުލޫމާތު ފޯރުކޮށްދިނުމަށް ނޫސްވެރީންނަށް ބަރޯސާވާ މީހުންގެ މެދުގައި ނުތަނަވަސްކަން އުފެދިގެން ހިނގައިދާނޭކަމަށް އެމަނިކުފާނު ވަނީ ވިދާޅުވެފައެވެ.
