ލޯކަލް ކައުންސިލް އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބު އަދި ރިޔާސީ އިންތިހާބާއި މަޖިލިސް އިންތިހާބު އެއްދުވަހެއްގައި ބޭއްވުމަށް ބާއްވާ ރައްޔިތުންގެ ހިޔާލު ހޯދުމުގެ އިންތިހާބުގެ ތެރެއިން، އިންތިހާބެއްގައި ވޯޓުލާން ބޭނުން ނޫން ނަމަ، އިލެކްޝަންސް އިން އެމީހަކަށް އެ އިންތިހާބެއްގެ ކަރުދާސްކޮޅެއް ނުދޭނެކަމަށް އެ އިދާރާއިން ބުނެފި އެވެ.
އީސީ އިން ފުލުހުންނާއެކު ކުރިއަށް ގެންދިޔަ ނޫސްވެރިންގެ ބައްދަލަވުމުގައި،އީސީގެ ރައީސް މުހައްމަދު ޒާހިދު ވިދާޅުވީ ވޯޓުލާންދާ ކޮންމެ މީހަކަށްވެސް ތިން ވޯޓު ކަރުދާސްކޮޅު ދޭނެ ކަމަށާއި ނަމަވެސް އެމީހަކު ބޭނުންވާ އިންތިހާބެއްގައި ބައިވެރިވުމުގެ އިހުތިޔާރު އެމީހަކަށް ލިބޭނެ ކަމަށެވެ. އަދި އެމީހަކު ވަކި އިންތިހާބެއްގައި ބައިވެރިވެފައި، ވަކި އިންތިހާބެއްގައި ބައިވެރިނުވާނަމަ އެކަން އިއުލާނުކުރާނެ ކަމަށްވެސް ޒާހިދު ވިދާޅުވި އެވެ.
މިކަން މިފަދައިން އިންތިޒާމު ކުރީ، އޮބްޒާވަރުންނާއި ދެންވެސް ތިބޭ ފަރާތްތަކަށް އެކަން ނޯޓު ކުރުމުގެ ފުރުސަތު ދިނުމަށް ކަމަށް އޭނާ ވިދާޅުވިއެވެ. 2021 ވަނަަ އަހަރުގައި ވެސް މިގޮތަށް އަމަލުކުރި ކަމަށް ޒާހިދު ވަނީ ފާހަގަކުރައްވާފަ އެވެ.
މާދަމާގެ އިންތިހާބުގައި ތިން ކަރުދާސްކޮޅު ވޯޓުލާ ކޮންމެ މީހަކަށް ލިބޭނެ ކަމަށާއި، ކޮންމެ ކަރުދާހެއްވެސް ކަނޑައަޅާފައިވާ ފޮއްޓަށް ލުމަށް ޒާހިދު ވިދާޅުވިއެވެ. ކޮންމެ ވޯޓު ކަރުދާހެއްގައި ނަމާއި ދާއިރާ ފެންނަހެން ފާހަގަކޮށްފައި ވާނެ ކަމަށާއި ކޮންމެ ފޮއްޓެއް ވެސް ވާނީ ވަކި ކުލައަކުން ލޭބަލް ކޮށްފައި ކަމަށް ޒާހިދު ވަނީ މައުލޫމާތު ދީފައެވެ.
އެގޮތުން އާންމުންގެ ހިޔާލު ހޯދުމުގެ ވޯޓު ލާންޖެހޭ ފޮށީގައި ހުންނާނީ ހުދު ކުލައިގެ ލޭބަލެއް ހަރުކޮށްފައި ކަމަށް އީސީ އިން މައުލޫމާތު ދެއެވެ. އަދި، ، ކައުންސިލް އިންތިހާބުގެ ވޯޓު ފޮށީގައި ހުންނަނީ ނޫ ކުލައިގެ ލޭބަލެއް ކަމަށާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުގެ ވޯޓު ފޮށީގައި ހުންނާނީ ފެހި ކުލައިގެ ލޭބަލެއް ކަމަށް އީސީ އިން ވަނީ މައުލޫމާތު ދީފައެވެ.
ވޯޓުލުން ހެނދުނު 8 ޖަހާއިރު ފެށުމަށް ހަމަޖެހިފައިވާއިރު، ވޯޓު ފޮށިތައް ބަންދުކުރާނީ ހަވީރު 04:00 ގައެވެ. ރާއްޖޭގެ އެކި ކަންކޮޅުތަކުގައި 500 އަށް ވުރެ ގިނަ ވޯޓު ފޮށި ވަނީ ބަހައްޓާފަ އެވެ.
