މި ރަމަޟާން މަހު އުމްރާއަށް ފުރުމަށް ތައްޔާރުވި އުމްރާވެރިންނަށް ފްލައިޓްތައް ކެންސަލްވުމާއި ގުޅިގެން މައްކާއަށް ނުދެވުމުން، އެ ފަރާތްތަކަށް ހާއްސަ އިންތިޒާމުތަކެއް ހަމަޖެއްސުމަސް މަސައްކަތްކުރަމުންދާ ކަމަށް ހައްޖު ކޯޕަރޭޝަނުން ބުނެފި އެވެ.
މެދު އިރުމަތީގެ ހަމަނުޖެހުމުގެ ސަބަބުން ގިނަ ފްލައިޓް ދަތުރުތަކެއް ކެންސަލްވެ އުމްރާ ދަތުރުތައް ވަނީ ގިނަ ބަޔަކަށް ނުދެވޭ ގޮތް ވެފަ އެވެ. މީގެ އިތުރަށް އުމްރާ ގްރޫޕަކުން ވެސް ފަހު ވަގުތު ދަތުރުތައް ކެންސަލް ކުރުމާ ގުޅިގެން 100 ވަރަކަށް މީހުންނަށް ނުފުރޭ ގޮތް ވި އެވެ.
މިކަމާ ގުޅޭގޮތުން ހައްޖު ކޯޕަރޭޝަނުން ބުނީ، ރައީސް ޑރ މުހައްމަދު މުއިއްޒުގެ އިރުޝާދއެކު، ފުލައިޓުތައް ކެންސަލްވުމުން ނުފުރިފަ ތިބި ފަރާތްތައް ޢުމްރާއަށް ފުރުވޭނެ ގޮތެއް ހޯދުމަށް އެ ކޯޕަރޭޝަނުން އިސްލާމިކް މިނިސްޓްރީއާއެކު މަސައްކަތްކުރަމުންދާ ކަމަށެވެ.
"މިވަގުތާހަމަ އަށް 150 މީހުން ފުރަން ބޭނުންވެފަ ތިބިކަން ވަނީ ފާހަގަކުރެވިފަ. ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މީގެ އިތުރުން ވެސް ޖާގަ އެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެ ވާހަކަ ދަންނަވަން. ވަގުތު ކުޑަތަންވެފައިވުމުން މިކަމުގައި ހުރި ދަތިތައް ޙައްލުވޭތޯ މަސައްކަތްކުރަމުންދާ ވާހަކަ ދަންނަވަން. "
އެ ކޯޕަރޭޝަނުން ބުނީ، ދިމާވި ސަބަބުތަކާއި ހުރެ ނުފުރިތިބި ފަރާތްތަކުގެ ތެރެއިން މި ފުރުސަތުގެ ބޭނުން ހިފާ ފަރާތްތަކުން، މާދަމާ މެންދުރު 12:00 ގެ ކުރިން އެ ކުންފުނީގެ އީމެއިލް sales@mhcl.mv އަށް މައުލޫމާތު ފޮނުއްވުމަށެވެ.
