ޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ އަސާސީ ކާބޯތަކެތީގެ ބާވަތްތައް ރާއްޖޭގެ ހުރިހާ ސަރަހައްދަކުންވެސް ހެޔޮ އަގުގައި ލިބެން ހުރިކަން ސަރުކާރުން ކަށަވަރުކޮށްދީފިއެވެ.

އިކޮނޮމިކް މިނިސްޓްރީއިން ބުނީ،މި ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން، ގަނޑުކޮށް މުދާ ހޯދުމާއި ރަށްރަށަށް މުދާ ފޯރުކޮށްދިނުމުގައި ދުރާލައި އެޅި ހަރުދަނާ ފިޔަވަޅުތަކުގެ ސަބަބުން، މުދަލަށް އޮތް ޑިމާންޑް ބޮޑުވި ނަމަވެސް ބާޒާރުގެ އަގުތައް ވަނީ އެއްވަރެއްގައި ހިފެހެއްޓިފައި ކަމަށެވެ.

"ވަކިން ޚާއްޞަކޮށް އަސާސީ ކާބޯތަކެތީގެ ލިސްޓަށް އިތުރުކުރެވުނު 23 ބާވަތާއެކު، ހަނޑޫ، ހަކުރު އަދި ފުށް ހިމެނޭހެން ޖުމުލަ 26 ބާވަތެއްގެ އަގު އިންތިހާއަށް އުފުލިގެން ނުދާނޭހެން އެސްޓީއޯއިން ކަނޑައަޅާފައިވާ ހެޔޮ އަގުތަކުގެ ސަބަބުން ބާޒާރުގައި ތަކެތީގެ އަގު ވަނީ ހިފެހެއްޓިފައި."

މިނިސްޓްރީ އިން ބުނީ،ކުރިއަށް އޮތް ހަފްތާތަކުގައިވެސް މުދާ މެދުނުކެނޑި ލިބޭނެކަން ކަށަވަރުކުރުމަށްޓަކައި، ބާޒާރުގައި ތަކެތީގެ އަގުތައް ހުރި މިންވަރު މޮނިޓަރކޮށް، ކަމާބެހޭ ފަރާތްތަކާ ގުޅިގެން ކުރަންޖެހޭ އެންމެހައި މަސައްކަތްތައް ކުރަމުން ކަމަށެވެ.

އެ މިނިސްޓްރީ އިން ބުނީ،މިއީ ރައްޔިތުންނަށް މެދުކެނޑުމެއް ނެތި، ހެޔޮ އަގުގައި މުދާ ފޯރުކޮށްދީ، ރަމަޟާން މަހު ޢާއިލާތަކުން އުފުލަންޖެހޭ މާލީ ބުރަ ކުޑަކޮށްދީ، ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް ސަރުކާރުން ކުރާ މުހިންމު މަސައްކަތެއް ކަމަށެވެ.