އަނބިމީހާ ނުވަތަ ފިރިމީހާގެ ފުލެޓު އޮތް ނަމެވެސް، ގޯއްޗަށް ކުރިމަތިލެވޭ ގޮތުގެ އުސޫލެއް ނެރެފިއެވެ.
ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްޠަލިބު ނޫސްވެރިންނާ ބައްދަލުކޮށް ދެއްކެވި ވާހަކަފުޅުގައި ވިދާޅުވީ، ފިރިމީހާ ނުވަތަ އަނބިމީހާގެ ޕްރޮޕަޓީ އެއް އޮވެގެން ޝަރުތު ހަމަނުވާ އާއިލީ ބޯހިޔާވަކިން އޮތް ނަމަވެސް، ގޯއްޗަށް ކުރިމަތިލުމުގެ ފުރުސަތު ސަރުކާރުން ހުޅުވާލާނެ ކަމަށެވެ.
ބިންވެރިޔާ ސްކީމުގެ ދަށުން ގޯތި ލިބޭ ފަރާތްތަކަށް ދިމާވެފައިވާ އިޖުތިމާއީ މައްސަލަތަކެއް ހައްލުކުރުމަށް އުސޫލެއް މިއަދު އިއުލާނު ކުރެވޭނެ ކަމަށް މިނިސްޓަރު ވިދާޅުވިއެވެ.
"އެއީ، ޖޮއިންޓް ވެގެން ކުރިމަތިލާފައި ތިބި ވަރަށް ގިނަ ފަރާތްތަކުން އެބަ އެދޭ، އެބޭފުޅުން ވަކި ވަކިން އެޕްލައި ކުރެވޭނެ ގޮތެއް ހަދައިދޭށޭ. އެއީ އާއިލީ މައްސަލަތަކާއި އިޖުތިމާއީ މައްސަލަތާއި އެއްކޮށް ޑިވެލޮޕްކޮށް، އެ މައްސަލަތައް ހައްލު ކުރުމަށްޓަކައި. ވަރަށް ގިނަ ފަރާތްތަކުން އެބަހުރި މިދިޔަ ދައުރުގައި އެ ޕްރޮގްރާމް ހިންގިިއިރު ޖޮއިންޓް ވެެގެން ނޫނިއްޔާ ނުލިބޭނެ ކަމަށް ބުނެފައި."
މިނިސްޓަރު ވިދާޅުވީ ބިންވެރިޔާ ހާއްސަ ސްކީމެއްގެ ގޮތުގައި ފުރުސަތު ދެނީ، ގޯތި ލިބިފައިވާ ހުރިހާ ފަރާތްތަކުން ގޯތި ދޫކޮށްލަން އެއްބަސްވެއްޖެ ކަމުގައި ވާނަމަ، ކޮންމެ މީހަކަށް ވަކިން ފްލެޓެއް ލިބޭ ގޮތަށް އެޕްލައި ކުރެވޭނެ ގޮތަށް ކަމަށެވެ.
ދެވަނަ ކެޓަގަރީ ބިންވެރިޔާ ސްކީމްގެ ޝަރުތުތައް ހަމަވެފައި، ފުލެޓު ދޫކޮށްލާފއި ބިމަށް ކުރިމަތި ލުން ކަމަށް މިނިސްޓަރު ވިދާޅުވިއެވެ.
"ސަރުކާރުން ދީފައި އިން ފުލެޓެއް އިނުމުގެ ސަބަބުން، ބިމަށް ކުރިމަތި ނުލެވުނު ފަރާތްތަކަށް، ފުރުސަތު މިދެނީ، އެތަން ސަރުކާރަށް ދޫކޮށްލާފައި، ބިމަކަށް ކުރިމަތިލެވޭނެހެން. މާނައަކީ ބިން ލިބޭ ހިސާބުން އެތަން ސަރުކާރާ ހަވާލުކުރުމަށް އެއްބަސްވާންޖެހޭނޭ."
މިނިސްޓަރު ވިދާޅުވީ އުއްމީދަކީ މިހާރު އިއުލާނުކޮށްފައިވާ ސްކީމްތަކުން އެކަށީގެންވާ ހައްލެއް ބޯހިޔާވަހިކަމަށް ލިބިގެންދާނެ ކަމަށެވެ.
