މާލޭގައި ދިރިއުޅޭ ރައްޔިތުންގެ ތެރެއިން، ދައުލަތުގެ އެކި މުއައްސަސާތަކަށް ދޭ ފްލެޓްތަކުން،އަދަދާއި ޝަރުތުތައް ހައުސިން މިނިސްޓްރީން އިއުލާނުކޮށްފިއެވެ.

28 ޑިސެމްބަރު 2025 ގައި ގެޒެޓްކުރި "މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުސޫލު" އާ ގުޅިގެން މިނިސްޓްރީއިން ވަނީ އަނެއްކާވެސް އިއުލާނެއް ގެޒެޓްކޮށްފައެެވެ. އެ އިއުލާނުގައި،  ބޯހިޔާވަހިކަން ފޯރުކޮށްދިނުމުގައި ޚާއްސަ އިސްކަންދެވޭ ކެޓަގަރީތަކުގެ ލިސްޓުގައި ހިމެނޭ އިދާރާތަކާއި މުއައްސަސާތަކުގެ ކެޓަގަރީތަކަށް އެދި ހުށަހަޅާ ފަރާތްތަކުން އުސޫލުގައިވާ ޝަރުތުތަކުގެ އިތުރުން ފުރިހަމަވާންޖެހޭ ޝަރުތުތައް ވަނީ އިސްލާހުކޮށްފައެވެ.

މިއާއެކު،މި ކެޓަގަރީއަށް ހުށަހެޅޭނީ މާލޭގައި ދިރިއުޅޭ އާއިލާ، އަދި އެ މުވައްސަސާއެއްގައި މަދުވެގެން އެއް އަހަރު ދުވަހު މަސައްކަތްކޮށްފައިވާވަނަމައެވެ. އެގޮތުން ފްލެޓު ހަވާލުކުރުމާއެކު، އެމީހަކު މަސައްކަތްކުރާ  މުއައްސަސާއަކުން ކަނޑައަޅާ ގޮތަކަށް، ވަޒީފާ އަދާކުރުމަށް އެއްބާސްވާންޖެހޭނެއެވެ.

"އާއިލީ ބޯހިޔާވަހިކަން" ޕްރޮގްރާމްގެ ދަށުން، ހާއްސަ އިސްކަމެއްދޭ ކެޓަގަރީގެ ފްލެޓުތަކުން 1000 ފްލެޓު ދިނުމަށް ވަނީ ހަމަޖެހިފައެވެ. އޭގެތެރެއިން އެންމެ ގިނަ ފްލެޓް ދެނީ ސިވިލް ސާރވީސް މުވައްޒަފުންނަށެވެ. ސިވިލް ސާވިސްގެ މުވައްޒަފުންނަށް 200 ފުލެޓު ދިނުމަށް ވަނީ ނިންމާފައެވެ.

ހާއްސަ ކެޓަގަރީތައް:
ސިވިލް ސާރވީސް- 200 ފުލެޓު
ފުލުހުންގެ ހިދުމަތް- 100 ފުލެޓު
އެމް.އެން.ޑީ.އެފް- 100 ފުލެޓު
މޯލްޑިވްސް ކަރެކްޝަނަލް ސާވިސް- 100 ފުލެޓު

މީގެއިތުރުން،ދައުލަތުގެ މިނިވަން މުއައްސަސާތަކާއި އެހެނިހެން މުއައްސަސާތަކަށް ޖުމުލަ 400 ފްލެޓް ވަނީ ހާއްސަކޮށްފަ އެވެ. އޭގެތެރޭގައި ރައީސް އޮފީހާއި، ރައްޔިތުންގެ މަޖިލިސް ހިމެނޭހެން 24 ދާއިރާއެއް ހިމެނެއެވެ. ކެޓަގަރީތަކަށް ކުރިމަތިލާއިރު، އަސާސީ ޝަރުތުތަކުގެ އިތުރުން ފުރިހަމަވާންޖެހޭ ހާއްސަ ޝަރުތުތަކެއް މިނިސްޓްރީއިން ވަނީ ކަނޑައަޅާފައެވެ.

މި ޕްރޮގްރާމަކީ 18 އަހަރުން މަތީގެ ކޮންމެ ދިވެހި ރައްޔިތަކަށް ބޯހިޔާވަހިކަން ފޯރުކޮށްދިނުމުގެ ސިޔާސަތުގެ ދަށުން ކުރިއަށްގެންދާ ޕްރޮގްރާމެކެވެ.