ކ. މާފުށްޓާއި އެރަށު ހިއްކި ސަރަހައްދު ގުޅުވައިދޭ ކޯޒްވޭގެ އަމަލީ މަސައްކަތް ފަށައިފި އެވެ.
އެމްޓީސީސީ އިން ބުނީ، ރާއްޖޭގައި އެންމެ ފުޅާ ދާއިރާއެއްގައި ގެސްޓްހައުސް ވިޔަފާރި ހިންގާ އެއް ރަށްކަމުގައިވާ މާފުށީ ރައްޔިތުންނަށް ކޯޒްވޭގެ މަސައްކަތް ނިމުމާއެކު ދަތުރުފަތުުރު ކުރުމަށް ލުއިފަސޭހަތަކެއް ލިބިގެންދާނެ ކަމަށާއި މުދާ އުފުލުމާއި ބޭލުމުގެ ކަންކަން ވެސް މިހާރަށްވުރެ ހަރުދަނާވެގެން ދާނެކަމަށެވެ. މީގެއިތުރުން، ހިއްކާފައިވާ ސަރަހައްދުން ބޯހިޔާވަހިކަމާއި، ސިނާއީ ބޭނުންތަކަށާއި، ވިޔަފާރި ބޭނުންތަކަށް ބިން ދޫ ކުރާއިރު، ރަށުގެ އުމްރާނީ އަދި އިގްތިސާދީ ތަރައްގީ އިތުރަށް ކުރިއަރާނެ ކަމަށް އެމްޓީސީސީ އިން ވަނީ ބުނެފަ އެެވެ.
މި މަޝްރޫއުގެ ދަށުން މާފުށްޓާއި އެރަށުގައި ހިއްކި ސަރަހައްދު ގުޅާލުމަށް ހަމަޖެހިފައިވަނީ 137 މީޓަރުގެ ބްރިޖަކުންނެވެ. އެމްޓީސީސީގެ މި މަޝްރޫއުގެ އަގަކީ،35.42 މިލިއަން ރުފިޔާ އެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ އެއް އަހަރުތެރޭ ނިންމާގޮތަށެވެ.
މި މަޝްރޫއު އަމަލީ ގޮތުން ފެށުމުގެ މުނާސަބަތުގައި މާފުށީގައި ވަނީ ރަސްމިއްޔާތެއް ބާއްވާފައެވެ. މި ރަސްމިއްޔާތުގެ ރަށުގެ ކައުންސިލްގެ އިސްވެރިންނާއި ސަރުކާރުގެ އިސް ބޭފުޅުން ބައިވެރިވެލެއްވި އެވެ.
