މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން، ދިވެހި އުމްރާވެރިން ޚާރިޖިއްޔާ އަދި ސައުދީ އަރަބިއްޔާގެ ސަރުކާރުގެ އިރުޝާދުތަކަށް ތަބާވުމަށް އިސްލާމީ ކަންތައްތަކާއި ބެހޭ ވަޒީރު، މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

'އެކްސް' ގައި ހިއްސާ ކުރެއްވި ޕޯސްޓެއްގައި ޝަހީމް ވިދާޅުވީ،މެދު އިރުމަތީގައި ހިނގަމުންދާ ކަންކަމާ ގުޅިގެން ރާއްޖޭގެ ޢުމްރާވެރިންގެ ކަންކަން ވަރަށް ގާތުން ބަލަމުންދާ ކަމަށެވެ. މީގެ އިތުރުން ޝަހީމް ވިދާޅުވީ ހައްޖު ކޯޕަރޭޝަންގެ އިތުރުން 20 ކުންފުންޏަކުން ޖުމުލަ 2 ހާހަށް ވުރެ ގިނަ މީހުން މި ފަހަރު ރޯދަ މަހު ޢުމްރާގެ އަޅުކަން އަދާކުރާ ކަމަށެވެ. އޭގެތެރެއިން، އެއްބައި އުމްރާވެރިން މިހާރު ވަނީ މައްކާގައި ކަމަށާއި،ބައެއް ކުންފުނިތަކުން ރޯދަ މަހު 15 ގައި ފުރާގޮތައް އޮތީ ރާވާފައި ކަމަށް ޝަހީމް ވަނީ ވިދާޅުވެފައެވެ.

"އަޅުގަނޑުގެ އިލްތިމާސަކީ އެންމެހައި ޢުމްރާވެރިން ދިވެހި ޚާރިޖިއްޔާގެ އިލްތިމާސްތަކާއި ސަޢުދީ ޢަރަބިއްޔާގެ ސަރުކާރުގެ އިރުޝާދުތަކަށް ތަބަޢަވުން. މައްކާއާއި މަދީނާއާއި ޖިއްދާގެ އެއާޕޯޓްގައި ވެސް އިރުޝާދުތަކަށް ތަބާވުން."

މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ރާއްޖެ އަށް ދިމާވެދާނެ ދަތިތައް ގާތުން ބެލުމަށް، ރައީސް ޑރ މުހައްމަދު މުއިއްޒު ވަނީ ހާއްސަ ކޮމެޓީއެއް އެކުލަވާލާފައެވެ. މި ކޮމެޓީގައި މިނިސްޓަރު ޝަހީމްގެ އިތުރުން. 8 ވަޒީރަކު ހިމެނިވަޑައިގަންނަވައެވެ.