ސަރުކާރުގެ ވިސްނުމާ ދެކޮޅު ކައުންސިލްތަކުގެ ސަބަބުން، ރަށްރަށުގައި 57 މަޝްރޫއެއް ހުއްޓިފައި އެބައޮތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިފަދައިން ވިދާޅުވީ، އާޓިފިޝަލް ބީޗުގައި ބޭއްވި ޕީއެންސީގެ ތަރާވީހުގައި ވާހަކަފުޅު ދައްކަވަމުންނެވެ. އެ މަނިކުފާނު ވިދާޅުވީ، މާލޭގެ މޭޔަރަކަށް އެމަނިކުފާނު ހޮވިވަޑައިގަތުމުން، ސްޓްރެޓީޖިކް ޕްލޭންގެ ފޮތެއް އެކުލަވާލާފައިވާ ކަމަށެވެ.
އެފޮތް ނަންގަވަމުން ރައީސް ވިދާޅުވީ، އެ ފޮތުގައި މާލޭގެ ރައްޔިތުންނަށް ކޮށްދޭން ނިންމާފައިވާ ކަންކަން އެ ފޮތުގައި ހިމަނާފައިވާނެ ކަމަށެވެ. ނަމަވެސް އެގޮތަށް ކަން ނުހިނގާ ކަމަށް ރައީސް ވަނީ ވިދާޅުވެފައެވެ. ރައީސް ވިދާޅުވީ، ކައުންސިލްތަކުގެ ރައީސުންނާއި މޭޔަރުންނަށް ޕީއެންސީ ވިސްނުމާ ދެކޮޅު ބޭފުޅުން ތިއްބަވައިގެން ސަރުކާރަށް އުނދަގޫވާ ކަމަށެވެ.
ރައީސް ވިދާޅުވީ ސަރުކާރުގެ ވިސްނުމާ ދެކޮޅު ސިޔާސީ ޕާޓީތަކާއި ހުރެ، ރަށްރަށުގައި 57 މަޝްރޫއެއް ހުއްޓިފައި އެބައޮތް ކަމަށެވެ.
“މިއީ އެންމެ މިސާލެއް. މިފަދަ އެތައް ކަމެއް އެބަހުރި ކައުންސިލްތަކުން ހުރަސް އެޅުމުގެ ސަބަބުން ރައްޔިތުންނަށް އަޅުގަނޑު ވި ވައުދުތައް ބާރު ސްޕީޑުގައި ގެންދިއުމުގައި ހުރަސް އެޅިފައި."
ރައީސް ވަނީ މަސައްކަތްތައް ބާރު ސްޕީޑްގައި ގެންދިއުމަށް، ޕީއެންސީގެ ކެންޑިޑޭޓުން ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ހޮވައިދެއްވުމަށް ގޮވާލައްވާފައެވެ.
