މިހާރުގެ މާލެ ސިޓީ މޭޔަރު އާދަމް އާޒިމަކީ އަމިއްލަ ޖީބަށް ބަރުވާ ގޮތަށް ނޫނީ އެއްވެސް ކަމެއް ކުރާ މީހެއްް ނޫން ކަމަށް ޑެޕިއުޓީ މޭޔަރު މުހައްމަދު އަރީޝް ވިދާޅުވެއްޖެއެވެ.
އަރީޝް މިހެން ވިދާޅިވެފައި ވަނީ ދާދި ފަހުން އެމްޑީޕީން ބޭއްވި އިވެންޓެއްގައި އަރީޝްގެ އަގު ވައްޓާލަން މަސައްކަތްކޮށް އާޒިމް ދައްކާފައިވާ ވާހަކަތަކަކަށް ރައްދު ދެމުންނެވެ. މި މައްސަލަ މިއަދު ކައުންސިލް ބައްދަލުވުމުގައި ވެސް ހޫނު ވެފައިވާއިރު، އެ ބައްދަލުވުމުގައި އަރީޝް ވަނީ އާޒިމް މޭޔަރު ކަމުގައި ކުރައްވާ ނުކިއްސަރު އެތައް ކަމެއް ހާމަކޮށްފަ އެވެ.
އަރީޝް އެކްސްގައި ހިއްސާކޮށްފައިވާ ޕޯސްޓެއްގައި ވިދާޅުވީ، މޭޔަރު އާޒިމް މަގާމުގެ ނާޖާއިޒް ބޭނުންކޮށްގެން، ޚިޔާލުތަފާތު ކައުންސިލަރުންނަށް ބިރުދައްކައި އިންޒާރުދޭން އެކި ގޮތްގޮތުން މަސައްކަތް ކުރުމަކީ ވަރަށް ދަށްފެންވަރުގެ ނާތަހުޒީބު ކަމެއް ކަމަށެވެ.
އަރީޝް ވިދާޅުވީ، ކިތަންމެ ވަރަކަށް ހަގީގަތް ފޮރުވަން އުޅުނަކަސް މޭޔަރު އާޒިމް ހިންގި ޖަރީމާތަކާއި ކޮރަޕްޝަން ރައްޔިތުންނާ ހަމަޔަށް ތިލަވާނެ ކަމަށެވެ. އަދި، މޭޔަރު އާޒިމްގެ ވިސްނުން އަބަދުވެސް ހުންނަނީ ސިޓީ ކައުންސިލުން ކުރާ ކޮންމެ މޮޅުކަމެއްގެ ކްރެޑިޓް އެހެން އެކަކަށްވެސް ނުދީ އަމިއްލައަށް ހޯދަން ކަމަށްވެސް އަރީޝް ވަނީ ވިދާޅުވެފައެވެ.
“ކައުންސިލަރުންނާއި އިސްބައެއް މުވައްޒަފުން ރެޔާދުވާލު ލޯބޯފިއްސައިގެން ބޮޑެތި ގުރުބާނީވެގެން ރައްޔިތުންގެ މަންފާއަށް ކޮށް ނިންމާ ކޮންމެ ކަމެއްގެ ރީތިނަން މަކަރާ ހީލަތުން ދަމައިގަންނަން. މިވާހަކަތައް ކައުންސިލް ޖަލްސާތަކުގައި އަޅުގަނޑު ދައްކާތީ މޭޔަރަކަށް އެކަން ހަޖަމެއް ނުވޭ.”
އަރީޝް ވިދާޅުވީ މޭޔަރު އާޒިމް އުޅުއްވަނީ، ސިޓީ ކައުންސިލް އަމިއްލަ ގޭގެ ފިހާރައަކަށް ހަދައިގެން ކަމަށާއި، އެއްވެސް ކައުންސިލަރަކަށް އާޒިމް އިޚްތިރާމް ނުކުރާ ކަަމަށެވެ. އަދި ހައްގުތައް ވެސް އަދާ ނުކޮށްދޭ ކަމަށެވެ.
“މިވާހަކަތައް އަޅުގަނޑު ތަކުރާރުކޮށް ދައްކާ ހަގީގަތް ހާމަކުރާތީ ކިތަންމެ ވަރަކަށް ޒާތީ ވިޔަސް މި އަޒުމެއް ނުގުޑާނެ. މި ރޫޙު މަރައެއް ނުލެވޭނެ.”
އަރީޝް ވިދާޅުވީ، ކައުންސިލް ޖަލްސާތަކުގައި އަދިވެސް މޭޔަރުގެ ހަގީގަތް ރައްޔިތުންނަށް ހާމަކޮށްދޭނެ ކަމަށާައި، އަގުވައްޓާލަން ހަދާ ދޮގުތަކަކުން، ދޭ އިންޒާރަކުން ނުސިހޭނެ ކަމަށެވެ.
