ފޯޅަވަހީގެ ސިޔާދަތީ ބާރު ހައްގުވަނީ ރާއްޖެއަށް ކަމަށާއި، މޮރިޝަސް އަށް ނޫން ކަމަށް އިނގިރޭސިވިލާތުގެ އެންމެ މަގުބޫލު ސިޔާސީ ޕާޓީ ކަމަށްވާ ރިފޯމް ޔޫކޭގެ ލީޑަރު ނައިޖަލް ފަރާޖް ވިދާޅުވެއްޖެ އެވެ.
އިނގިރޭސިވިލާތުގެ ގާނޫނު ހަދާ މަޖިލީހުގައި ދެއްކެވި ވާހަކަފުޅުގައި ފަރާޖު ވިދާޅުވީ، ރަށްތަކުގެ މިލްކުވެރިކަން މޮރިޝަސްއަށް ބަދަލުކުރުމަށް އިނގިރޭސި ވިލާތުން ވަރަށް މަސައްކަތްކުރާ ކަމަށާއި އެ މަސައްކަތާ މެދު ރާއްޖެއިން މާޔޫސް ވެއްޖެ ކަމަށެވެ. އެގޮތުން، މޮރިޝަސް ހުށަހަޅާފައިވާ ދައުވާއަށް ރައްދު ދައުވާއެއް ވަރަށް އަވަހަށް ރާއްޖެއިން ހުށަހެޅާނެ ކަމަށް ވެސް ފަރާޖު ވަނީ ވިދާޅުވެފަ އެވެ.
ފަރާޖުގެ ވާހަކުފުޅުގައި، ރާއްޖެއާއި ފޯޅަވަހީގެ ރަށްތަކާއި މެދު އިތް ތާރީހީ ގުޅުން ވެސް ވަނީ ފާހަގަކުރައްވާފައެވެ. ފަރާޖު ވިދާޅުވީ އޭނާ ރާއްޖެއަށް ކުރި ދަތުރުން ކުރިން ނޭނގޭ އެތަށް ކަމެއް އެނގުނު ކަމަށެވެ. އެގޮތުން، ފަރަންސޭސިން ހަމައެކަނު ކުރި ކަމަކީ އެ ރަށްތަކުގެ ނަންތައް ބަދަލުކުރުން ކަމަށް ފަރާޖު ވިދާޅުވި އެވެ.
މީގެއިތުރުން، ހުރިހާ ގޮތަކުން ބަލާއިރުގައިވެސް ، މޮރިޝަސްއަށް ކުރެވޭނެ ދައުވާއެއް ނެތް ކަމަށް ފަރާޖު ވަނީ ވިދާޅުވެފައެވެ.
ފަރާޖު އިތުރަށް ވިދާޅުވީ، އައިސީޖޭން ވަކި ނިންމުމެއް ނިންމަންދެން، ގާނޫނު ހަދާ މަޖިލީހަށް ހުށަހަޅާފައިވާ ބިލު ފާސްނުކޮށް މަޑުޖައްސާލުމަށެވެ.
ފަރާޖު ވަނީ މިފަހުން ރާއްޖެ ވަޑައިގެންފައެވެ. އޭނާ ރާއްޖެ ވަޑައިގަތީ، ޗާގޯސްގެ ހަތަރު މީހަކަށް ބޭނުންވާ ކާބޯތަކެއްޗާއި ބޭސް ފަރުވާ ކޮށްދިނުމަށެވެ. ދިވެހި ސަރުކާރުން އިނގިރޭސިވިލާތުގެ އެންގުމަކަށް އޭނާގެ ޗާގޯސް ދަތުރަަސް ހުރަސް އެޅިކަމަަށްވެސް އޭނާ ވަނީ ތުހުމަތުކޮށްފައެވެ.
އެހެންނަމަވެސް، ދިވެހި ސަރުކާރުން ވަނީ މިކަން ދޮގުކޮށް، މީޑިއާތަކަށް ރިޕޯޓްކޮަށްފައެވެ.
ޖިއޮގްރަފީގެ ގޮތުންނާއި ތާރީހީ ގޮތުންނާ އަދި ގާނޫނީ ގޮތުން ވެސް ޗާގޯސް ލިބެންޖެހެނީ ރާއްޖެއަށް ކަމަަށް ރައީސް މުއިއްޒު ވަނީ މީގެ ކުރިން ވިދާޅުވެފައެވެ.
