އެސްޓީއޯ ފިހާރަތަކުން ވިއްކާ ފިޔާ އަދި އަލުވީގެ އަގު ހެޔޮ ކޮށްފި އެވެ.

އެސްޓީއޯ އިން އަގުތަޖކަށް ގެނައި ބަދަލަށް ބަލާއިރު، ކުރިން 12 އަށް ވިއްކި ފިޔާ ކިލޯ މިހާރު ވަނީ 10 ރުފިޔާއަށް ބަދަލުކޮށްފަ އެވެ. އަދި އަލުވީގެ އަގަށް ގެނައި ބަދަލާއެކު، ކުރިން 14 އަށް ވިއްކި އަލުވި މިހާރު ވިއްކަނީ 12 އަށެވެ.

މީގެ ކުރިން ފިޔާ ބަސްތާއެއް 250 އަށް ވިއްކާއިރު، މިހާރު ވިއްކަނީ 190 ރުފިޔާއަށެވެ. އަލުވި ބަސްތާގެ އަގު ވެސް ވަނީ 300 އިން 160 އަށް ތިރިކޮށްފައެވެ.

އެސްޓީއޯ އިން ބުނީ މި ބަދަލަކީ، ރޯދަމަހު އާންމުކޮށް ބޭނުންކުރާ، ތަކެތީގެ އަގުތައް ކުޑަކޮށް، ރައްޔިތުންނަށް ލުއި ފަސޭހަ ކޮށްދިނުމަށް އެޅި ފިޔަވަޅެއް ކަމަށެވެ.

މީގެއިތުރުން، ކާބޯތަކެތީގެ އަސާސީ ބާވަތްތަކުގެ އަގުތައް އެއް ހަމައެއްގައި ބެހެއްޓުމަށާއި ރައްޔިތުންނަށް ދަތި ކަމެއް ނެތި، އެ ތަކެތި ލިބޭނެ މަގު ފަހިކޮށްދިނުމަށް މަސައްކަތްކުރާ ކަމަށް އެސްޓީއޯ އިން ވަނީ ބުނެފައެވެ.

އެސްޓީއޯ އިން ވިއްކާ އަސާސީ ކާބޯތަކެތިގެ ބާވަތް އާންމުންނަށް ވަކި ވަކިން ވިއްކަން ލިބޭނީ އެސްޓީއޯގެ ޕީޕަލްސް ޗޮއިސްގެ ފިހާރަތަކުންނެވެ.  އެސްޓީއޯ އިން ބުނީ، ގަނޑުކޮށް މި ތަކެތި ބޭނުންވާ ފަރާތްތަކަށް އެސްޓީއޯގެ ހޯލް ސޭލް ސެންޓަރުތަކުން ލިބޭނެ  ކަމަށެވެ.