ކުރިއަށް އޮތް ލޯކަލް ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރައްވާ ތިނަދޫ ސިޓީގެ ކެނޑިޑޭޓުންގެ، މާލޭ ކެމްޕެއިން އޮފީސް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ހުޅުވައިދެއްވައިފިއެވެ.
ރޭ ކުރިއަށްގެންދިޔަ މި ހަފުލާގައި މެޑަމް ސާޖިދާގެ އިތުރުން، ޕާޓީގެ އިސްވެރިންނާއި، ތިނަދޫ ސިޓީ ކައުންސިލާއި އަންހެނުން ގެ ކޮމެޓީއަށް ވާދަކުރައްވާ ކެނޑިޑޭޓުންވެސް ބައިވެރިވެ ވަޑައިގެންނެވިއެވެ. އަދި ޕާޓީގެ ގިނަ މެމްބަރުންނާއި، ދާއިރާގެ ރައްޔިތުން ވެސް ބައިވެރިވެވަޑައިގެންނެވި އެވެ.
މިއަންނަ އޭޕްރީލް މަހުގައި ކައުންސިލް އިންތިޚާބު ބޭއްވުމަށް ހަމަޖެހިފައިވާއިރު، ސިޔާސީ ޕާޓީތަކުން ދަނީ އަތޮޅުތަކާއި މާލެސިޓީގައި ވެސް ކެމްޕެއިނުގެ ހަރަކާތްތައް ކުރިއަށް ގެންދަމުންނެވެ. އެގޮތުން ގުރޭޓާ މާލެ ސަރަހައްދުތަކުގައާއި އެހެން ސިޓީތަކުގައި ޕީއެންސީގެ ކެންޕެއިން ޖަގަހަތައް ދަނީ ހުޅުވަމުންނެވެ. މިފަދަ ބައެއް ޖަގަހަތައް ހުޅުވުމުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ބައިވެރިވެރިވެވަޑައިގަނެފައިވެއެވެ.
