މާލޭގެ ފެން ހިންދާ ނިޒާމު އިތުރަށް ހަރުދަނާކޮށް އޮޓޮމޭޓްކުރުމަށްޓަކައި ޖަޕާނުގެ ކުންފުންޏެއް ކަމަށްވާ ޓެކް އިންޓަރނޭޝަނަލް އިންކޯޕަރޭޝަނާއެކު އެއްބަސްވުމެއްގައި ސޮއިކޮށްފިއެވެ.
މި މަޝްރޫއަކީ ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ކުރިއަށްގެންދާ "ޕްރޮޖެކްޓް ފޮރ ޑިޒާސްޓަރ ރެޒިލިއެންސް އެންހޭންސްމަންޓް އިން މާލެ އައިލެންޑް" ގެ ދެވަނަ ޕެކޭޖުގެ މަސައްކަތެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ހަސަން ރަޝީދެވެ. އަދި ޓެކް އިންޓަރނޭޝަނަލް އިންކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ މަކޯޓޯ ޔޮކޮށީ އެވެ. މި މަޝްރޫޢުގެ ސަބަބުން މާލެއަށް ކުރިމަތިވާ ފެންބޮޑުވުމުގެ މައްސަލައަށް ދާއިމީ އަދި ޒަމާނީ ހައްލެއް ލިބިގެންދާނެ ކަމަށް ބެލެވެއެވެ.
މި ޕެކޭޖުގެ ދަށުން މާލޭގައި މިހާރު ޤާއިމްކޮށްފައިވާ 16 ޕަންމްޕް ސްޓޭޝަން އޮޓޮމޭޓްކުރުމަށް ބޭނުންވާ އެންމެހާ އާލާތްތައް ހަރުކުރުމަށް ވަނީ ހަމަޖެހިފައެވެ. މީގެ އިތުރުން، މި ހުރިހާ ޕަންމްޕް ސްޓޭޝަންތަކެއް އެއް ތަނަކުން ބަލަހައްޓައި މޮނިޓަރ ކުރެވޭނެ ފަދަ ސެންޓްރަލައިޒްޑް މޮނިޓަރިންގް ސްޓޭޝަނެއް ވެސް މި މަޝްރޫޢުގެ ދަށުން ޤާއިމްކުރެވޭނެއެވެ.
ފެން ހިންދާ ނިޒާމު ދެމެހެއްޓެނިވި ގޮތެއްގައި ބެލެހެއްޓުމަށްޓަކައި، ނިޒާމުގެ މެއިންޓެނަންސް މަސައްކަތްތަކަށް ބޭނުންވާ ޚާއްޞަ ޖެޓިންގެ ވެހިކަލްއެއް ފޯރުކޮށްދިނުމަށް ވެސް މި އެއްބަސްވުމުގައި ވަނީ ހިމަނާފައެވެ. މިއީ މާލޭގެ މަގުތަކުގައި ފެންބޮޑުވާ ހާލަތްތަކުގައި އަވަސް ފިޔަވަޅު އެޅުމަށް ލިބިގެންދާނެ ބޮޑު އެހީތެރިކަމެކެވެ.
މި މަޝްރޫއަކީ މާލެއަކީ ކާރިސާތަކަށް ތައްޔާރުވެފައިވާ، ރައްކާތެރި ތަނަކަށް ހެދުމަށް ސަރުކާރުން ކުރަމުންދާ މަސައްކަތުގެ މުހިންމު ބައެކެވެ.
