އަންނަ ޖޫންގައި ބޭއްވުމަށް ހަމަޖެހިފައިވާ ސިވިލް ސާވިސް ކޮންފަރެންސްގެ ޕްލެޓިނަމް ސްޕޮންސަރެއްގެ ގޮތުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު ސޮއިކޮށްފިއެވެ.
މި އެއްބަސްވުމުގައި އެމް.ޕީ.އެލްގެ ފަރާތުން ސޮއިކުރެއްވީ އެ ކުންފުނީގެ ޗީފް ކޯޕަރޭޓް އޮފިސަރު އަބްދުﷲ ރަޝީދެވެ. ސިވިލް ސަރވިސް ކޮމިޝަން (ސީ.އެސް.ސީ) ގެ ފަރާތުން ސޮއިކުރެއްވީ އެ ކޮމިޝަނުގެ ރައީސް މުޙައްމަދު މުޖުތާޒު އެވެ.
ފަސްވަނަ ސިވިލް ސަރވިސް ކޮންފަރެންސް ބޭއްވުމަށް ތާވަލުކޮށްފައިވަނީ 2026 ވަނަ އަހަރުގެ ޖޫން މަހުގެ 7 އިން 9 އަށެވެ. މި ފަހަރުގެ ކޮންފަރެންސްގެ ޝިޢާރަކީ، "ފިއުޗާ- ރެޑީ ރެސްޕޮންސިވް ގަވަރނަންސް: އެމްޕަވާ ޕީޕަލް، އެމްބްރޭސް އެޖިލިޓީ، އެންހޭންސް ސާވިސަސް" އެވެ.
މި ކޮންފަރެންސަކީ ދިވެހި ސިވިލް ސާވިސްއަށް ދިމާވެފައިވާ ގޮންޖެހުންތައް ދެނެގަނެ، ސިވިލް ސާވިސްގެ ހިންގުން އިތުރަށް ހަރުދަނާކޮށް ތަރައްގީކުރާނެ ގޮތްތަކެއް ތަދުބީރުކުރުމުގެ މަގުސަދުގައި ބާއްވާ ބައްދަލުވުމެކެވެ. ސިވިލް ސާވިސްގެ އިސްވެރިންނާއި ސިޔާސީ އިސްފަރާތްތައް ހިމެނޭގޮތަށް ކޮންމެ ދެ އަހަރަކުން އެއް އަހަރު މި ކޮންފަރެންސް ސިލްސިލާކޮށް ބާއްވަމުންގެންދެއެވެ.
2026 ވަނަ އަހަރު ބާއްވާ މި ކޮންފަރެންސްގައި ސިވިލް ސަރވިސްގެ އެކި އިދާރާތަކުން 200 އަށް ވުރެ ގިނަ ބައިވެރިން ބައިވެރިވާނެ ކަމަށް ސިވިލް ސާވިސް ކޮމިޝަނުން މަޢުލޫމާތުދެއެވެ.
