ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ) ގެ ޕީޕަލްސް ޗޮއިސްގެ އައުޓްލެޓެއް ހުޅުމާލޭގައި ރަސްމީކޮށް ހުޅުވައިފިއެވެ.
ރޭ ބޭއްވި ހާއްސަ ރަސްމިއްޔާތެއްގައި މި އައުޓްލެޓް ހުޅުވައިދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދުއެވެ.
ހުޅުމާލޭގެ އާބާދީ ދުވަހެއް ދުވަހަކަށް ބޮޑުވަމުންދާއިރު، އެސްޓީއޯގެ ފިހާރައެއް އެ ސަރަހައްދުގައި ނެތުމަކީ ގިނަ ބައެއްގެ ޝަކުވާއެއްކަން ފާހަގަކޮށް އެސްޓީއޯއިން ބުނީ، އަލަށް ހުޅުވުނު މި އައުޓްލެޓާއެކު ހުޅުމާލޭގައި ދިރިއުޅޭ ރައްޔިތުންނަށް އެސްޓީއޯއިން ވިއްކާ މުދާތައް ފަސޭހަކަމާއެކު ލިބިގެންދާނެ ކަމަށެވެ. މި ފިހާރަ ހުންނާނީ ހުޅުމާލޭ ރީތިގަސް މަގުގައި ހުންނަ ރެއިން ކޮރަލް ރެޒިޑެންސްގައެވެ.
ކުރިއަށް އޮތް ބަރަކާތްތެރި ރަމަޟާން މަހަށް އަމާޒުކޮށް ހުޅުވި މި އައުޓްލެޓުން ހަނޑޫ، ހަކުރު އަދި ފުށުގެ އިތުރުން އަސާސީ ކާބޯތަކެތީގެ ލިސްޓަށް އަލަށް އިތުރުކުރި 23 ބާވަތެއް ލިބެން ހުންނާނެއެވެ. މީގެ އިތުރުން މާލޭގެ ޕީޕަލްސް ޗޮއިސްއިން ލިބޭ އެސްޓީއޯގެ އަމިއްލަ ބްރޭންޑްތަކުގެ އުފެއްދުންތަކާއި، ހިޓާޗީ، އެލްޖީ އަދި ފިލިޕްސް ބްރޭންޑުގެ ހޯމް އިމްޕްރޫވްމެންޓް ސާމާނުވެސް މި އައުޓްލެޓުން ލިބޭނެ ކަމަށް އެސްޓީއޯއިން މައުލޫމާތުދެއެވެ.
އެސްޓީއޯއިން އިތުރަށް ބުނީ މި އައުޓްލެޓުން އަސާސީ ކާބޯތަކެތީގެ ހުރިހާ ބާވަތެއް ރީޓެއިލްކޮށް ލިބެން ހުންނާނެ ކަމަށެވެ. އަދި ކުރިއަށް އޮތް ތަނުގައި ހުޅުމާލޭގެ ވިޔަފާރިވެރިންނަށް ހޯލްސޭލްކޮށް މުދާ ދޫކުރުމުގެ އިންތިޒާމުތައްވެސް ހަމަޖައްސާނެ ކަމަށް އެ ކުންފުނިން ބުންޏެވެ.
މި އައުޓްލެޓަކީ ރަމަޟާން މަހާ ދިމާކޮށް ހުޅުވި ތަނެއް ނަމަވެސް، ރަމަޟާން މަހަށް ފަހުވެސް މި ފިހާރައިގެ ހިދުމަތް މެދުނުކެނޑި އާންމުންނަށް ލިބެމުންދާނެ ކަމުގެ ޔަގީންކަން އެސްޓީއޯއިން ވަނީ ދީފައެވެ.
