ނިމިދިޔަ ހުކުރު ދުވަހުން ފެށިގެން، ކޮންމެ ހުކުރު ދުވަހެއްގެ ވަކި ގަޑިތަކެއްގައި ތެލަސީމިއާ ސެންޓަރުން ޚިދުމަތް ލިބެމުންދާނޭކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.
މިހިނގާ ފެބުރުވަރީ މަހުގެ 20 ވީ ހުކުރު ދުވަހުން ފެށިގެން، ދިވެހިރާއްޖޭގެ ތެލެސީމިއާ ސެންޓަރުގައި ހުކުރު ދުވަހު ހިދުމަތްދޭން ފެށިފައިވާކަން ފާހަގަކުރައްވައި، މިއަދު 'އެކްސް’ގައި ހިއްސާކުރެއްވި މެސެޖެއްގައި ރައީސުލްޖުމްހޫރިއްޔާ ވިދާޅުވީ، އެ މަރުކަޒުގެ 31 އަހަރުގެ ދިގު ތާރީހުގައިވެސް މީގެ ކުރިން ރަސްމީ ސިފައެއްގައި ހުކުރު ދުވަހު ހިދުމަތްދީފައިނުވާ ކަމަށެވެ.
އެގޮތުން ނިމިދިޔަ ހުކުރު ދުވަހު އެކަނިވެސް އެ މަރުކަޒުން 14 މީހަކަށް ލޭ އެޅުމުގެ ހިދުމަތްދީ، 5 މީހަކު ލޭ ހަދިޔާކޮށްފައިވާކަން އެމަނިކުފާނު ފާހަގަކުރެއްވިއެވެ. އަދި ރޯދަ މަސް ނިމުމުންވެސް، ހުކުރު ދުވަހުގެ ވަކި ގަޑިތަކެއްގައި އެ މަރުކަޒުގެ ހިދުމަތް ލިބޭނޭކަމަށް ރައީސް ވިދާޅުވިއެވެ.
މި އިސްލާޙީ ބަދަލުގެ ސަބަބުން، ހަފުތާ ބަންދުގައި އަތޮޅުތަކުން މާލެ އައިސް ލޭ އަޅަން ބޭނުންވާ ފަރާތްތަކަށާއި ލޭ ހަދިޔާކުރަން ބޭނުންވާ ފަރާތްތަކަށް އެ ފުރުސަތު ފަހިވެގެންދާނެއެވެ. މިއީ ތެލަސީމިއާ ބައްޔަށް ފަރުވާ ހޯދުމަށް ހުރި ފުރުޞަތުތައް އިތުރުކޮށްދެއްވައި، ޚިދުމަތްތައް ހަރުދަނާކުރެއްވުމަށް ސަރުކާރުން ކުރައްވާ މަސައްކަތުގެ ތެރެއިން ގެނައި ބަދަލެކެވެ.
ތެލެސީމިއާ ސެންޓަރުގެ ހިންގުމާއި ހިދުމަތްތައް ހަރުދަނާކުރުމުގެ މަސައްކަތްތަކަކީ، ސީދާ ރައީސުލްޖުމްހޫރިއްޔާގެ ބެއްލެވުމުގެ ދަށުން ކުރަމުންދާ މަސައްކަތެކެވެ.
